Kebon Raya Cibodas

Ti Wikipédia, énsiklopédia bébas
Luncat ka: pituduh, sungsi
Kebon Raya Cibodas

Kebon Raya Cibodas nyaeta hiji wewengkon anu ngoleksi rupa-rupa pepelakan kalawan mibanda dasar ilmiah.[1] Eta informasi ilmiah ngeunaan tutuwuhan koleksina téh didokumentasikeun kalawan apik.[1] Fungsi Kebon Raya nyaeta minangka tempat konservasi ex-situ, tempat panalungtikan, tempat pangatikan lingkungan jeng tempat pelesir.[1]

Kebon Raya Cibodas nyaéta salah sahiji kebon raya di Indonésia anu kaasup minangka kebon raya pangpunjulna kelas dunya utamana dina widang konsérvasi tutuwuhan, panalungtikan, jeung palayanan dina aspék botani jeung pangatikan lingkungan.[2]

Perenahna di suku gunung Gedé Pangrango dina ± 1300-1425 m dpl.[2] Kalawan legana 125 ha nu hawana tiis kalawan pamandangan nu kalintang éndahna. Suhu rata-rata 18° C, kalembaban 90% jeung curah hujan pertaunna 3380 mm².[2] Bisa dihontal ti Jakarta kira-kira ngan ukur 3 jam (± 100 km) jeung 2,5 jam mun ti arah Bandung (±80 km).[2]

Kasang Tukang Sajarah[édit | sunting sumber]

Curug Cibogo nu aya di Kebon Raya Cibodas

Kebon Raya Cibodas diadegkeun tanggal 11 April 1985 ku Johannes Ellias Teijsmann, saurang kurator Kebon Raya Bogor mangsa harita, kalawan dingaranan Bergtuin te Tjibodas (Kebon Pagunungan Cibodas).[2] Awalna mah ieu patempatan téh dimaksudkeun pikeun tempat aklimatisasi rupa-rupa tutuwuhan asal luar nagri anu mibanda ajén penting jeung ékonomi nu luhur, salah sahijina nyaéta tangkal Kina (Cinchona calisaya).[2] Tuluy mekar jadi bagian ti Kebon Raya Bogor kalawan ngaranna Cabang Balai Kebun Raya Cibodas.[2]

Ti mimiti taun 2003 status Kebon Raya Cibodas téh jadi leuwih mandiri minangka Unit Pelaksana Teknis (UPT) Balai Konservasi Tumbuhan Kebun Raya Cibodas nu aya di handapeun Pusat Konservasi Tumbuhan Kebun Raya Bogor dina Kedeputian Ilmu Pengetahuan Hayati Lembaga Ilmu Pengetahuan Indonesia (LIPI).[2]

Koléksi[édit | sunting sumber]

Nepika kiwari, Kebon Raya Cibodas – LIPI mibanda 10.792 koléksi pepelakan, 700 rupa koléksi sisikian, 4.852 koléksi hérbarium.[2] Koléksi pepelakan Kebon Raya Cibodas – LIPI kabagi jadi dua koléksi nyaéta koléksi kebon jeung koléksi rumah kaca.[2] Koléksi pepelakan nu aya di rumah kaca diantarana nyaéta [[angkrék] (320 rupa), kaktus (289 rupa), jeung sukulén (162 rupa), tapi salian ti éta réa ogé tutuwuhan liar nu bisa kapanggih di kebon.[2] Ana pon koléksi pepelakan di kebon jumlahna 1.014 rupa, diantarana aya pepelakan has jeung unik, kayaning tangkal kina (Cinchona pubescens Vahl) nu mangrupa pepelakan ubar pikeun ngubaran panyakit malaria.[2]

Tangkal Bunya-bunya (Araucaria bidwilli Hook.) nu mangrupa pepelakan kolot jeung poga puhu tangkal nu pohara gedé.[2] Camara (Cupressus spp.) mibanda daun nu unik.[2] Kembang raksasa Amorphophalus titanum (Becc.) Becc. (Kembang Bangké) anu bisa narik perhatian serangga, Castanopis argentea (Blume) A. DC. (Saninten), anu sikina ngeunah didahar. Altingia excelsa Noronha (Rasamala) daun ngorana bisa dijieun lalab jeung kaina alus pikeun furnitur.[2] Paphiopedilum javanicum (Lindl.) Pfitzer (Angkrék Kasut Héjo) salah sahiji angkrék asli asal pulo Jawa.[2] Macodes petola Lindl. (Angkrék Kiaksara) angkrék nu aya garis-garis bodas dina unggal daunna.[2] Rhododendron javanicum (Blume) Benn. Nyaéta kembang oranyeu has wewengkon tropika.[2] Echinocactus grussoni Hildm. (Kaktus Tong Emas/[[Kaktus Korsi Mitoha [Kursi Mertua]]] nyaéta salah sahiji koléḳsi unik nu aya di Rumah Kaca Kaktus.[2]

Réferénsi[édit | sunting sumber]

  1. a b c (id) Selamat Datang di Kebun Raya Cibodas(diakses tanggal 22 Oktober 2011)
  2. a b c d e f g h i j k l m n o p q r s (id) LIPI. -. Kebun Raya Cibodas. Cianjur: LIPI (liflét/brosur)


Nulis.jpg