Basisir Palabuhanratu

Ti Wikipédia Sunda, énsiklopédi bébas
(dialihkeun ti Basisir Palabuan Ratu)

Citakan:Infobox tempat pelesir Basisir Palabuhanratu atanapi langkung kasohor Basisir Pelabuhan Ratu nyaéta mangrupa salah sawiosna tempat pelesir nu aya di kabupatén Sukabumi.[1]

Orang Eropa di basisir Palabuhanratu taun 1929

Kasohor ku alamna nu éndah, hawana nu seger tur amparan basisir nu kacida legana.[1] Alatan kaéndahanana nu béda jeung tempat lianna, Presiden Soekarno ngawangun hiji tempat istirahat dina taun 1960 di Tenjo Resmi.[2] Salian ti éta, Soekarno ogé ngawangun Samudera Beach Hotel, salah sahiji hotél nu agréng nu aya di Indonesia bareng jeung diwangunna Hotel Indonesia jeung Bali Beach Hotel.[2]
Salian ti alamna nu éndah, basisir Palabuhanratu ogé kawentar ku sawatara mitos jeung ritual-ritual hasna saperti hajat laut jeung upacara ngabungbang.[2]
Mitos nu raket pisan jeung ngaran Palabuhanratu nyaéta ngeunan Nyi Roro Kidul nu dipercaya jadi pangawasa di Laut Kidul.[2]
Sedengkeun hajat laut nu mangrupa ritual rutin, aya patalina ogé jeung Nyi Roro Kidul.[2] Hajat laut nyaéta ngalungkeun hulu munding jeung sasajén lianna ka tengah laut minangka ucapan sukur masarakat ka Nyi Roro Kidul réhna geus dipaparin kalancaran nalika ngala lauk di laut.[1] Ieu tradisi dilaksanakeun sataun sakali unggal tanggal 5 April.[1] Biasana ieu hajat dibarengan ku acara baksos, pasanggiri-pasanggiri, pintonan hiburan (wayang, dangdut, drumband, ibing, jeung sajabana).[1]
Salian ti hajat laut, aya ogé tradisi séjén nu disebut ngabungbang.[1] Kecap ngabungbang asalna tina “Nga” nu hartina ngahijikeun jeung “bungbang” nu hartina miceun atawa ngabérésihan.[1] Jadi, sacara umum ieu ritual miboga harti mandi suci pikeun ngaleungitkeun hal-hal nu goréng atawa miceun sial.[1] Ieu ritual ogé minangka sarana dina ngadu’a kanu Kawasa.[1] Dimimitian ti jam 12 peuting tanggal 14 Mulud nu tempatna di walungan Cisukawayana, Basisir Palabuhanratu.[1] Numutkeun masarakat satempat, ieu tradisi diciptakeun ku Raja Hyang Brahma ti Karajaan Medang Gali (Galuh) dina taun 175 M-205 M nu dituluykeun ku Prabu Siliwangi ti Karajaan Pajajaran tur mekar nepi ka kiwari.[1]

Referensi[édit | édit sumber]

  1. a b c d e f g h i j k Pantai Pelabuhan Ratu Archived 2011-08-26 di Wayback Machine (Diakses tanggal 30 Oktober 2011) (id)
  2. a b c d e Keindahan Laut Berselimut Mistik Archived 2011-09-16 di Wayback Machine (Diakses tanggal 30 Oktober 2011) (id)