Borondong
Borondong
Nyaéta sangray jagong, gandrung jsté. anu lamun geus beukah dikalua maké gula saeutik atawa dicampuran kinca atawa peueut supaya engkéna ngahiji.[1] Ngajual borondong biasana dibuleud-buleud atawa diemplé-emplé.[1] Borondong téh salah sahiji kadaharan tradisional ti tatar Sunda.[2] Borondong kaasup kana jenis ‘’makanan ringan’’ atawa caneuteun.[2] Bahan utama borondong téh béas ketan, ieu saluyu jeung kabudayaan sarta lingkungan alam kahirupan urang Sunda anu kacida deukeutna jeung paré.[2] Pikeun nambahan aroma sangkan jadi seungit, sok maké danas atawa manggah kawéni, biasana dicampurkeun jeung gulana.[2] Rupa-rupa wangun borondong, aya nu buleud, aya nu gépéng.[2] Aya nu gedé ayanu leutik.[2] Nu gedé biasana baruleud, anu laleutik wangunna gépéng parasagi.[2]
Aya dua jenis borondong nyaéta borondong garing jeung borondong entén.[2] Borondong garing dijieun tina paré ketan, disangray dijieun beledug jagong (pop corn) heula.[2] Sanggeus ngabeledug jagong, dipiceunan cangkangna (huut badagna) nepi ka bérésih.[2] Sanggeus bérésih dikincaan ku kinca gula beureum atawa kinca gula bodas.[2] Borondong entén mah nyieun entén ketan heula, sanggeus kitu dibuleud-buleud, terus dibulen ku beledug jagong.[2]
Anu nyieun borondong umumna industri rumah tangga.[2] Umumna aya di daérah Bandung kidul, saperti di Kacamatan Ibun.[2]
Dina taun 2004 borondong Ma Érah ngahontal préstasi meunang panghargaan Rékor MURI.[2] Borondong panggedéna ngawangun replika Gedong Saté diluluguan ku organisasi pakumpulan juru masak di Bandung, Bandung Chef Association.[2] Borondong sok aya dina upacara-upacara adat di padésan, disuguhkeun pikeun caneuteun.[2]
 |
Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |
Rujukan
[édit | édit sumber]- 1 2 Panitia Penerbitan Kamus Basa Sunda. 2006. Kamus Basa Sunda R.A. Danadibrata. Bandung: Kiblat Buku Utama. ISBN 979-3631-91-0
- 1 2 3 4 5 6 7 8 9 10 11 12 13 14 15 16 17 http://elib.unikom.ac.id/files/disk1/529/jbptunikompp-gdl-aderahmats-26433-4-unikom_a-i.pdf Archived 2015-05-12 di Wayback Machine diakses tanggal 13 Nopémber 2011