Dargah Haji Ali

Ti Wikipédia Sunda, énsiklopédi bébas
Loncat ke navigasi Loncat ke pencarian

Dargah Koordinat: 18°59′06″N 72°48′36″E / 18.985°N 72.81°E / 18.985; 72.81Haji Ali nyaéta masigit atawa dargah anu mibanda ajén sajarah sarta mangrupa simbul Islam pangkakoncarana di Mumbai. Dargah Haji Ali ngadeg di hiji pulo leutik di deukeut basisir Worli, bagéan kidul kota Mumbai. Ieu wangunan diadegkeun taun 1431 minangkana mah pikeun pangéling-éling Sayid Pir Haji Ali Shah Bukhari. Ieu wangunan mibanda ajén kaagamaan teu ngan saukur pikeun masarakat muslim hungkul, kitu ogé dipikareueus ku masarakat hindu disabudeureunna, malah mah kiwari jadi tujuan wisata anu kawilang penting di Mumbai. Saéstuna ieu wangunan téh mangrupa komplék astana atawa monumén Sayid Pir Haji Ali Shah Bukhari, nu mana anjeunna téh mangrupa saurang sufi, Haji sarta sodagar beunghar nu asalna ti Uzbékistan, tuluy ngalanglang buana nika antukna mah tilar dunya sarta dimakamkeun di ieu dargah.

Sajarah[édit | édit sumber]

Dargah Haji Ali diadegkeun taun 1431 anu mana tujuanna nyaéta pikeun miéling saurang sodagar muslim anu beunghar, jenenganna Sayyed Pir Haji Ali Shah Bukhari, anu ngahibahkeun sakum hartana bandana saméméh jarah ka Mekah. Ieu Haji Ali téh asalna ti Bukhoro, nu kiwari nagara Uzbékistan, Haji Ali ngalanglang buana ti awal abad ka-15 nepi ka patengahan abad ka-15, nu antukna mah tumetep di India, perenahna mah di Mumbai kiwari.

Numutkeun dongéng nu sumebar, baheula Haji Ali kungsi manggihan awéwé nu keur ceurik balilihan di jalan sabari nyekel bejana kosong. Tuluy Haji Ali tumanya ngeunaan masalah naon nu nyababkeun ieu awéwé ceurik. Ngawalon ieu awéwé yén manéhna bakal dicarék ku salakina, lantaran manéhna teu kahaja geus mahékeun minyak anu dibawa na éta bejana sabab tikojot. Tuluy Haji Ali ménta ka éta awéwé supaya dianteur ka tempat manéhna mahékeun éta minyak. Di éta témpat, Haji Ali nojoskeun curukna kana taneuh, tuluy tina urut nojoskeun curukna téh ngaburial minyak dan minyak. Kacida bungahna éta awéwé laju minuhan bejanana ku minyak nu kaluar téa, sarta langsung balik.