Emmanuelle Charpentier
| Emmanuelle Charpentier | |
|---|---|
 Emmanuelle Charpentier, Agustus 2015 | |
| Lahir | 11 Désémber 1968 Juvisy-sur-Orge, Prancis |
| Kabangsaan | Prancis |
| Institusi | Univérsitas Wina Univérsitas Umeå Perkumpulan Max Planck |
| Alma mater | Univérsitas Pierre dan Marie Curie Institut Pasteur |
| Dipikawanoh lantaran | CRISPR |
| Situs web www | |
Emmanuelle Charpentier (lahir Juvisy-sur-Orge, 11 Désémber 1968) nyaéta élmuwan mikrobiologi asal Prancis anu babarengan jeung biokimiawan asal Amérika, Jennifer Doudna, manggihan téknologi molekul anu disebut CRISPR-Cas9. Panalungtikan maranéhna dina taun 2012 jadi inovasi dina widang éditing gén, ngamungkinkeun para panalungtik pikeun ngarobah runtuyan DNA kalayan akurasi luhur. Dibandingkeun jeung métode saméméhna, CRISPR-Cas9 leuwih basajan tur efisien dina ngaropéa materi genetik. Ku jasana dina bidang panalungtikan, Charpentier jeung Doudna dipasihan gelar Nobel Prize di bidang Kimia taun 2020.[1][2]
Pendidikan
[édit | édit sumber]Charpentier tumuwuh di deukeut Paris. Anjeunna ngagaduhan kasenangan dina rupa-rupa widang saprak leutik. Anjeunna meunang gelar sarjana dina widang biokimia ti Universitas Pierre jeung Marie Curie, nu ayeuna jadi bagian ti Universitas Sorbonne, taun 1992. Pikeun diajar pascasarjana, anjeunna asup ka Institut Pasteur, tempat anjeunna nalungtik bagian DNA baktéri anu bisa pindah dina génom sarta mawa résistansi kana ubar antara sél. Dina taun 1995, anjeunna ngaréngsékeun gelar doktor dina widang mikrobiologi sarta neruskeun panalungtikan pascadoktoral di institut éta salila sataun.[1][2]
Sanggeus kitu, Charpentier neruskeun studi pascadoktoral di Universitas Rockefeller di New York. Anjeunna ogé kantos digawé salaku asistén panalungtik di Puseur Médis Universitas New York saméméh janten rekan panalungtik di Rumah Sakit Panalungtikan Barudak St. Jude di Memphis, teras di Skirball Institute of Biomolecular Medicine di New York.[1][2]
Karier
[édit | édit sumber]Dina taun 2002, Charpentier balik deui ka Éropa. Anjeunna janten panalungtik di Universitas Wina. Di dinya, anjeunna manggihan molekul RNA pangatur anu boga peran dina ngontrol faktor virulénsi baktéri Streptococcus pyogenes. Kalawan bantosan mikrobiolog molekul Jörg Vogel ti Max Planck Institute for Infection Biology di Berlin, anjeunna hasil ngaidentifikasi RNA leutik anyar dina génom S. pyogenes sarta mimiti nalungtik sistem CRISPR baktéri éta, anu dipaké pikeun ngalawan virus. Charpentier mendakan yén sistem CRISPR dina S. pyogenes diwangun ku tilu komponén utama nyaéta racrRNA (trans-activating CRISPR RNA), CRISPR RNA, jeung, protein Cas9, anu leuwih basajan ti nu anjeunna perkirakeun.[1][2]
Taun 2009, Charpentier neruskeun panalungtikanana ngeunaan CRISPR di Puseur Panalungtikan Mikrobiologi Umeå di Swédia. Kalawan bantosan Elitza Deltcheva, mahasiswa pascasarjana anu kungsi damel di laboratorium Charpentier di Wina, anjeunna nunjukkeun kumaha sistem CRISPR tiasa motong sareng nyunting DNA dina lokasi husus dina génom. Salah sahiji panalungtikan penting Deltcheva nyaéta bukti yén tracrRNA jeung CRISPR RNA gawé babarengan pikeun nungtun Cas9 ka runtuyan DNA nu tangtu. Hasil panalungtikan Charpentier, Vogel, jeung Deltcheva ieu terbit dina taun 2010. Taun salajengna, Charpentier patepung sareng Jennifer Doudna. Maranéhna gancang gawé bareng, anu ahirna ngahasilkeun kapanggihna mékanisme kumaha Cas9 motong DNA dina taun 2012. Panalungtikan ieu hasil diterapkeun kalayan suksés pikeun nargétkeun sarta nyunting runtuyan DNA husus dina rupa-rupa organisme.[1][2]
Taun 2013, Charpentier ngadegkeun CRISPR Therapeutics babarengan, hiji pausahaan anu nerapkeun métode CRISPR pikeun terapi gén manusa. Pausahaan ieu boga operasi di Cambridge, Massachusetts, kalayan kantor pusat di Zug, Suis. Charpentier ogé jadi anggota déwan panasehat élmiah di pausahaan éta. Terus dina Ttaun 2015, sanggeus dua taun damel di Hannover Medical School di Jerman, Charpentier ngalihkeun laboratoriumnya ka Max Planck Institute.[1][2]
Pangajén
[édit | édit sumber]Charpentier meunang rupa-rupa panghargaan bergengsi, di antarana Canada Gairdner International Award (2016) jeung Kavli Prize in Nanoscience (2018). Salian éta, anjeunna ogé kapilih jadi anggota Royal Swedish Academy of Sciences taun 2015 jeung European Academy of Sciences and Arts taun 2018.