Cangkaléng

Ti Wikipédia Sunda, énsiklopédi bébas
Siki jeung Buah Kawung anu geus dikulub

Cangkaléng atawa Caruluk mun dina basa Walanda mah disebut glibbertkjes nyaéta protein albumin anu diperlukeun ku binih tangkal kawung minangka sasadiaan kadaharanana.[1] Buah anu kadar caina luhung ieu dicokot tina siki buah kawung anu wangunna lonjong gepéng, getahan tur matak ateul,[1] warnana bodas herang, sarta geunyal.[2] Pikeun dijadikeun cangkaléng, buah kawung kudu dibeuleum heula nepi ka tutung atawa dikulub sababaraha jam.[1] Tuluy dikeueum ku cai kapur sababaraha poé nepi ka pamustunganana sikina bisa dikokolakeun.[1] Cangkaléng didagangkeun dina kaayaan kakeueum ku cai disebut cangkaléng atah.[2] Cangkaléng atah bisa diolah dijieun manisan, campuran kolek, setup buah, atawa sirop.[1]
Cangkaléng ngandung serat anu luhung, alus pikeun jalma anu keur diit.[3] Dina 100 gramna, ngandung kadar cai nepi ka 93,8%.[3] Cangkaléng ogé ngandung 0,69 gram protein, 4 gram karbohidrat, sarta kadar lebu kira-kira sagram sarta serat 0,95 gram.[3] Kandungan karbohidrat nu aya dina cangkaléng bisa matak wareg, ogé bisa ngeureunkeun nafsu dahar sarta ngabalukarkeun konsumsi kadaharan turun.[3] Salian ti alus pikeun diit, cangkaléng ogé miboga mangpaat pikeun mantuan ngalancarkeun gawé saluran cerna manusa.[3]

Referensi[édit | édit sumber]

  1. a b c d e Khasiat buah Archived 2011-10-07 di Wayback Machine (id) (Diakses ping 20 Oktober 2011)
  2. a b Kolang-kaling[tumbu nonaktif] (id) (Diakses ping 20 Oktober 2011)
  3. a b c d e Kolang-kaling Archived 2012-03-13 di Wayback Machine (id) (Diakses ping 20 Oktober 2011)