Langensari (majalah)

Ti Wikipédia Sunda, énsiklopédi bébas
(dialihkeun ti Langensari (mj))

Langensari nyaéta majalah bulanan, anu ka béhdieunakeun robah jadi tengah bulanan, diterbitkeun ku CV Langensari, Bandung.[1] Lantaran kaasup kana majalah umum, majalah Langensari réa ngamuat carita-carita panglipur mangrupa carita pondok jeung carita nyambung, kitu deui dangding jeung sajak.[1] Pamingpin umum dicepeng ku TS. Subary, ari pamingpin redaksina dicepeng ku P.Nataprawira jeung wakilna ku Drs. R.M. Atmamihardja. .[1] Dina réngréngan rédaksina mindeng gunta-ganti tara lila, di antarana nu kungsi jadi redaksina téh nyaéta Caraka, S.M.E. Permana, Sunarya PK, ari sekretaris redaksi dicepeng ku Memed Erawan ti mimiti awal terbit tug dugi ka eureun dina taun 1968.[1] Ieu majalah téh loba méré kasempetan pikeun pangarang-pangarang anyar makalangan, anu engkéna malah jadi pangarang anu kawentar saperti Sunarya PK, Min Resmana, Rahmat M Sas Karana, jeung réa-réa deui.[2]Caraka réa ngamuat karya-karya mangrupa carita pondok jeung carita nyambung dina ieu majalah, di antarana nyaéta anu ka behdieunakeun medal mangrupa buku judulna Sripanggung jeung Menak Baheula.[1] Ari Min Resmana,pangarang golongan muda, réa ngamuat carita pondok jeung carita serial Si Kabayan nu medal unggal nomer, anu eusina réa nyindiran kana kahirupan masarakat mangsa harita, anu sawareh mah dipilih jeung dikumpulkeun jadi buku judulna Si Kabayan Tapa.[1]




Rujukan[édit | édit sumber]

  1. a b c d e f Rosidi,Ajip,dkk.Ensiklopedi Sunda: Alam,Manusia, dan Budaya.Pustaka Jaya.Jakarta 2000.kaca 374
  2. Kartini,Tini,spk.Biografi dan Karya Sasatrawan Sunda Masa 1945-1965.Proyek Penelitian Bahasa dan Sastra Indonésia dan Daerah Depdikbud.Bandung1978.kaca 26