Makam Godog

Ti Wikipédia Sunda, énsiklopédi bébas
Loncat ke navigasi Loncat ke pencarian


Makam Godog nyaéta makam nu aya di daérah Gunung Karacak perenahna di Désa Lebak Agung, Kacamatan Karangpawitan Garut.[1]
Ieu makam dipercaya minangka makam Prabu Kéan Santang, putra Prabu Siliwangi ti Karajaan Pajajaran.[1] Hal ieu ogé kacutat dina sawatara naskah kayaning Babad Godog, Babad Pasundan, jeung Wawacan Prabu Kéan Santang Aji.[1] Dina naskah-naskah éta dicaritakeun yén Kéan Santang téh putra Prabu Siliwangi jeung Nyi Subang Larang ti Karajaan Pajajaran.[1][2] Sanggeus ngagem Islam di Mekah, ngaranna robah jadi Sunan Rohmat atawa Syéh Rohmat. ku lantaran dimakamkeuna di Godog, disebut ogé Sunan Godog.[1]
Sunan Godog atawa Kéan Santang nyaéta nu nyebarkeun agama Islam dina ahir abad ka-15 nepi ka awal abad ka-16 di daérah Timbanganten (kiwari daérah Samarang, Tarogong, Kadungora, Lélés).[2] Numutkeun folklor lianna nu mekar di daérah Garut, nalika Kéan Santang balik ti Mekkah, anjeunna mawa taneuh nu disebarkeun di daérah-daérah di Indonésia.[2] Dina tiap taneuh éta murag mangrupa tempat lahirna wali songo.[2] Nalika rék asup ka Gunung Suci, taneuh nu dibawana godeg.[2] Lantaran éta ngaran Godog lahir, nepi ka Kéan Santang kasohor jadi Sunan Godog.[2]
Loba mitos nu nyaritakeun hal ieu.[1] di antarana aya nu nyebutkeun yén Kéan Santang kungsi paséa jeung bapana Prabu Siliwangi alatan Prabu Siliwangi nolak pikeun disunatan tur embung ngagem agama Islam sakumaha nu dipikahayang ku Kéan Santang.[1] Tapi Kéan Santang teu peunggas harepan, nepi ka tuluy ngungudag bapana sangkan sadia jadi muslim.[1] Tepi ka ahirna mah Prabu Siliwangi téh ngahiang.[1]
Makam Godog jumlahna aya 9 makam nu ngawengku 1 makam Sunan Godog sarta 8 makam para ponggawana.[2] Ieu makam ngajajar ti mimiti ponggawa nu kahiji nepi ka nu kadalapan, tuluy makam Sunan Godog aya di luhureun gunung.[2] Ukuran makam ampir sarua kurang leuwih 2m x 1m.[2] Makam Sunan Godog aya di jero wangunan pasagi panjang.[2]
Unggal bulan Mulud sok diayakeun upacara ngalungsar atawa turun jimat.[2] Upacara ieu dilaksanakeun unggal tanggal 14 Mulud minangka ébréhan rasa panghormat ti masarakat ka Sunan Godog alatan jasana dina nyebarkeun agama Islam.[2] Ébréhan panghormat ieu dilaksanakeun ku cara ngamumulé barang pusaka saperti rupa-rupa keris, kitab, Al-Quran, Cis, Skin, jeung sajabana.[2] Barang-barang ieu diturunkeun tina jero peti tuluy diteundeun di luhureun makam, tuluy dikumbah hiji-hiji maké cikembang jeung digosok maké minyak seungit sangkan teu babari karahaan, nu dilaksanakeun ku kuncénna.[2]
Kiwari, makam Godog loba didatangan ku nu jarah.[1] Ku sabagéan masarakat, makam ieu dianggap karamat lantaran Kéan Santang kalungguhanana sajajar jeung para wali nu gedé jasana dina nyebarkeun agama Islam di pulo Jawa.[1] Nu daratang ka ieu makam, henteu ti daérah Jawa wungkul, tapi loba ogé ti luar Jawa.[1]

Referensi[édit | édit sumber]

  1. a b c d e f g h i j k l Suhardiman,Budi&Darpan.2007.Seputar Garut.Garut:Komunitas Srimanganti (id)
  2. a b c d e f g h i j k l m n Makam Godog (Diakses tanggal 29 Oktober 2011) (id)


Nulis.jpg