Musieum Emas, Bogotá
Musieum Emas (Spanyol: Museo del Oro) mangrupakeun musieum arkéologi anu perenahna di Bogotá, Kolombia. Ieu musieum téh salah sahiji tujuan wisata anu panglobana didatangan di nagara éta.[1] Unggal taun, kira-kira 500.000 wisatawan ngadatangan musieum ieu.[2]
Di jerona, musieum nembongkeun rupa-rupa koléksi emas pra-Kolumbus jeung campuran logam séjén saperti tambaga. Musieum ieu miboga kumpulan artéfak emas panggedéna di dunya, anu dipintonkeun dina rohangan pameran lanté dua jeung tilu. Salian ti éta, aya ogé barang tina keramik, batu, cangkang, kai, jeung tékstil.[3] Sadaya barang éta, nu dijieun tina logam anu ku budaya pribumi dianggap suci, ngabuktikeun kahirupan jeung pamikiran masarakat anu kungsi hirup di wewengkon Kolombia ayeuna saméméh panaklukan Spanyol ka Amérika.
Loba kelompok pribumi teu nganggap emas minangka sumber kakayaan, tapi leuwih percaya yén éta emas miboga nilai simbolis jeung ajén agama. Contona, panakluk Spanyol ngalaporkeun yén kulawarga karajaan Inca ngaku jadi turunan panonpoé jeung bulan, sarta emas dianggap minangka “késang panonpoé” jeung pérak minangka “cipanon bulan.”[4]
Sajarah
[édit | édit sumber]Taun 1934, Bank Républik mimiti ngabantu ngajaga warisan arkéologi Kolombia. Barang anu kahiji diasupkeun kana koléksi nyaéta Poporo Quimbaya, anu geus dipintonkeun salila kira-kira 70 taun. Ayeuna musieum ieu dikelola ku Banrepcultural.[5] Musieum ogé nyimpen rakit emas Muisca anu kasampak di Pasca taun 1969. Rakit éta ngagambarkeun upacara pelantikan zipa anyar (pamingpin Muyquytá) anu jadi dasar mitos El Dorado. Dina patungna, pamingpin anyar éta nangtung di tengah rakit, dikurilingan ku para kapala suku, sadayana dihias ku emas jeung bulu.
Sanggeus sapuluh taun gawé, musieum ieu dimekarkeun jeung dirénovasi dina Oktober 2008. Rénovasi éta nambahkeun lima rohangan paméran permanén anu ngeusian barang arkéologi, hiji rohangan interaktif, ogé fasilitas anyar saperti auditorium, rohangan paméran samentara, kafé, réstoran, jeung toko cendera mata. Salian di Bogotá, aya ogé cabang Museo del Oro di sababaraha kota séjén di Kolombia, di antarana Calima, Quimbaya, Santa Marta, jeung Cartagena.[6]
Sumber rujukan
[édit | édit sumber]- ↑ "Museum of Gold - 22 Places to go in Bogota". www.bogotatravelguide.com. Diaksés tanggal 2025-09-24.
- ↑ Semana. "Los 75 del Museo del Oro". Semana.com Últimas Noticias de Colombia y el Mundo (Dina basa spanish). Diaksés tanggal 2025-09-24. Pemeliharaan CS1: Bahasa yang tidak diketahui (link)
- ↑ "Fake Gold? Tumbaga". www.torch.ox.ac.uk (Dina basa Inggris). Diaksés tanggal 2025-09-24.
- ↑ Bray, Warwick (1993-01-01). Niece, Susan La; Craddock, Paul (éd.). 16 - Techniques of gilding and surface-enrichment in pre-Hispanic American metallurgy. Butterworth-Heinemann. hlm. 182–192. ISBN 978-0-7506-1611-9.
- ↑ www.banrepcultural.org https://www.banrepcultural.org/en. Diaksés tanggal 2025-09-24.
- ↑ "Banco de la República de Colombia". colecciones.banrepcultural.org (Dina basa Spanyol). Diaksés tanggal 2025-09-24.