Sentra kulit Sukarégang
Sentra Kulit Sukarégang aya di Jalan Gagak Lumayung, Kecamatan Garut Kota, Kabupaten Garut, anu panjangna 500 meter. Sentra Kulit Sukarégang téh aya di daérah pakotaan.[1] Wilayah ieu mangrupa sentra pangrajin kulit,[2] sarta ngajajar toko-toko nu ngajual produk-produk anu bahan dasarna tina kulit.[1]
Sajarah Sentra Kulit Sukarégang
[édit | édit sumber]Sentra Kulit Sukarégang geus aya ti taun 1930-an. Teknologi nu dipaké di Sentra Kulit Sukarégang baheula masih sederhana jeung manual. Ayana Sentra Kulit Sukarégang ieu téh dipangaruhan ku sisi geografis Garut, nyaéta iklimna anu tiis kusabab dikurilingan ku Gunung. Kusabab tiisna iklim di Garut, perlu pakean anu haneut. Kulit mangrupa salah sahiji bahan pakean nu bisa ngajaga suhu awak supaya tetep haneut. Baheula, dina jaman Perang Dunia II, pilot pesawat tempur make jaket kulit keur ngalindungan awakna tina cuaca nu tiis. Baheula, di Garut, kulit sato siga kulit domba, sapi, jeung munding gampang kapanggih. Jadi, panyamak jeung pangrajin kulit baheula ngahasilkeun jeket kulit supaya warga Garut tetep ngarasa haneut di cuaca nu tiis.[3]
Mung aya ogé anu nyebutkeun yén karajinan kulit ieu téh awalna muncul gara-gara pangrajin nyieun insole atawa jeroan jang sendal tarumpah nu biasa dipaké ku urang Walanda.[4]
Produk di Sentra Kulit Sukarégang
[édit | édit sumber]Produk di Sentra Kulit Sukarégang téh loba rupa-rupa. Aya jaket, sapatu, kantong, dompet, gantungan konci, jeung sajabana. Hargana béda-béda, gumantung kana ukuran, motif, jeung warna produkna. Salian ti langsung meuli produk nu geus aya di tokona, di kawasan Sentra Kulit Sukarégang ogé bisa mesen sesuai jeung model nu dipikahayang.[1]
Kulit anu dipaké pikeun nyieun produk-produk di Sentra Kulit Sukarégang téh ngagunakeun kulit domba, sapi, jeung munding, disesuaikeun jeung karakter masing-masing kulit. Misalna, keur nyieun jaket, make kulit domba anu teksturna lembut. Sedengkeun kulit sapi atawa munding, dipaké pikeun nyieun sapatu, kantong, jeung beubeur. Produk ti Sukarégang ieu téh geus kasebar ka mancanagara, nyaéta ka Korea, Hongkong, jeung Jepang.[1]
Di Sentra Kulit Sukarégang téh aya nu ngajual produk tina kulit asli, aya ogé nu ngajual produk tina bahan imitasi. Produk imitasi ieu hargana sahandapeun harga produk kulit asli. Pikeun ngabedakeun kulit asli jeung imitasi, produkna bisa dibeuleum. Lamun produkna teu kabeuleum atawa teu leeh, éta produk tina kulit asli.[1]
Rujukan
[édit | édit sumber]- ↑ a b c d e "Sentra Industri Sukaregang, Pusatnya Wisata Belanja Berbahan Dasar Kulit". Indonesia Kaya. Diaksés tanggal 2025-02-09.
- ↑ Redaksi, Tim. "Kenapa Sukaregang Jadi Sentra Kerajinan Kulit Khas Garut? Ini Sejarahnya". GARUTMU.COM (Dina basa Indonesia). Diaksés tanggal 2025-02-09. Archived 2024-12-05 di Wayback Machine
- ↑ Infogarut. "Sukaregang Garut sejarah dan denyut industri kreatif kulit". infogarut.id (Dina basa Indonesia). Diaksés tanggal 2025-02-09.
- ↑ Ghani, Hakim. "Kerajinan Kulit Garut: Dari Terompah Belanda Ningrat-Jaket Pilot PD II". detikjabar (Dina basa Indonesia). Diaksés tanggal 2025-02-09.[tumbu nonaktif]