Urek

Urek nyaéta useup atawa eluk anu ditalian maké kenur beunang ngagintir/ngarara dipaké pikeun nguseup belut, nguseup belut dina liangna disebut ngurek^[1]. Useup anu geus dipasang eupan diasupkeun ka jero liang belut ku jalan digéré/dipuir-puir kenurna maké curuk jeung jempol bari jeung rada didedetkeun.^[2] Urek, useupna ngan ditalian baé henteu maké jeujeur.^[3] Ilaharna urek maké eupan bancét atawa cacing.^[4]^[5]

Pedaran[édit | édit sumber]

Ngurek belut ilaharna di sawah tapi sok aya ogé anu ngadon ngurek sisi balong, ogé sisi susukan,^[1] belut walungan, ranca, jeung balong biasana leuwih gedé malahan nepika aya anu sagedé indung suku.^[4] Kenur anu dipaké nalian useup/eluk beunang ngagintir/ngarara dua rangkep atawa leuwih maksudna sangkan babari ngagerekeun kana liang belut, kuat tur teu babari pegat mangsana pakenyang-kenyang jeung belut tina liangna. Lantaran tanaga belutmah kawilang bédas, béda pisan jeung nguseup lauk.^[4]

Rupa-rupa Urek belut téh sagigireun anu biasa dipaké aya ogé anu disebut urek palang, jeung urek tengah. Urek palang mah useupna henteu ngeluk tapi lempeng, ngan tungtung jeung tungtungna diseukeutan, kenurna ditalikeun ditengah-tengahna. Cara gawé urek modél kieu nyaéta mangsana eupan diteureuy ku belut tuluy urekna ditarik usepna bakal niruk tur melag dina genggerong belut, sedengkeun urek tengahmah sarua jeung urek biasa, ngan ukuran kenurna leuwih pondok jeung tungtung kenurna ditalikeun kana régang awi^[4].