Kéler

Kéler atawa toplés wawadahan anu baku wangunna silinder atawa rada nyongcot, bahanna biasana mah dijieunna tina kaca, palastik atawa kramik. Ari liangna aya di bagéan luhur kalawan badag teu kawas botol nu liangna leutik, sarta aya tutupan nu bisa dipasangkeun kana derat palebah liang dina kéler.

Téhnik panutup kéler téh mémang nu ilahar mah maké sistim derat nu mana dina beuheung liang kéler téh aya deratan, ogé dina tutup bagéan jerona aya deratan, sanajan kitu aya téhnik tutup kéler séjén nu sok dipaké di antarana aya téhnik tutup dedet nu dina palebah tutupna téh aya karétan, sangkan lamun nutupanana téh kari didedetkeun baé, langsung rékép wéh. Aya deui téhnik tutup nyakup nu mana dina tutup kélérna téh aya ceulian, nu éta ceulinana téh bisa dikaitkeun kana séngkéd handapeun liang toplés. Aya ogé téhnik tutup bolostrong nu mana tutup toplés téh cukup dipasangkeun wéh kana liang kéler, biasana mah ieu téhnik tutup téh sok dipaké dina kéler beling, tutup kieu mah logor pisan. Nu leuwih basajan mah tutup kéler nu maké lawon, si lawon ditumpangkeun kana liang kéler tuluy rada diperot ka handap, palebah beuheungna nu katumpangan lawon téh dikarétan sangkan teu gampang coplok. Lian ti éta kabéh, aya téhnik tutup séjén mu meureun teu pati mindeng dipaké.

Kéler téh mangrupa wawadahan nu loba piparantieunna, boh dipaké pikeun barang padet boh pikeun barang cair. Mimindengna mah pikeun ngawadahan kadaharan, kosmétik, ubar, atawa bahan kimia. Nu geus pada arapal mah kéler nu dijieun tina bahan kaca nu mana sok bisa dipaké pikeun wawadahan kadaharan, kayaning selé, minyak zaitun, madu jsté.

Kéler distérilkeun kalawan diasupkeun kana cai ngagolak na jero panci pikeun sawatara menit mah. Mun digolakkeun bari aya kadaharan di jerona, dianggap fungsina kawas mikrowave pikeun ngahaneutkeun deui sarupaning kadaharan.