Alexandre Dumas

Ti Wikipédia Sunda, énsiklopédi bébas
Gambar:Nadar - Alexander Dumas pére (1802-1870) - Google Art Project 2.jpg
Alexander Dumas (Pére)

Alexandre Dumas Pére (senior) lahir di Villers Cotterets, Perancis tanggal 24 Juli 1802.[1]. Akina ti golongan ménak, ninina urang négro ti Santo Domingo.[1] Bapana jendral balatentara Napoléon anu perlaya mangsa Dumas kakara umur opat taun bari henteu ngawariskeun kakayaan nanaon.[1] Dumas diurus ku pendéta, laju digawé jadi juru tulis di salah sahiji kantor pangacara.[1]

Dina umur 21 taun pindah ka Paris babakti ka ménak urang dinya.[1] Dumas wawanohan jeung aktor ngaran Joseph Palma, sering lalajo tokoh-tokoh Shakespiere anu nimbulkeun ilham pikeun nulis lalakon Henry III, Anthony, jeung Kean anu kawilang suksés. Dumas nulis ogé novel-novel sajarah tur geus ditarjamahkeun kana rupaning basa.[1]

Nalika ngarang, Dumas dibantuan ku sawatara urang pangarang pikeun ngumpulkeun bahan-bahan karangan.[1]

Alexandre Dumas pére (senior), boga anak anu sangaran tur sarua pada-pada pangarang nyaéta Alexandre Dumas fils (junior).[1]

Sok sanajan panghasilan Dumas mucekil tina karangan-karanganana, tapi maotna dina taun 1870 dina kaayaan miskin.[1]

Lian ti ku Ermas, karya Dumas, Le Compte de Monte Cristo ditarjamahkeun kana basa Indonesia ku Nur Sutan Iskandar (1929) lobana genep jilid [2]. Karya nu séjénna The Three Muskeeter ogé ditarjamahkeun ku Nur Sutan Iskandar kana basa Indonésia (1925).[2]

Ku banget populérna, The Three Musketeers, karya klasik Dumas ieu terus ngajadikeun inspirasi ka para sinéas pikeun dipilemkeun.[3] Dina taun 2011 aya vérsi anyarna nu modéren anu ngalalakonkeun para pangawal Raja Perancis.[3]

Ieu lalakon masketir dina mangsa Barok sakira abad ka-17 téh munggaran medal dina wangun serial dina surat kabar Le Siecle, Maret nepi ka Juli 1844.[3]

The Three Musketeers atawa Les Trois Mousquetaires dina basa Perancis midangkeun palaku utama hiji pamuda ngaran d'Artagnan anu ngagabung jeung tilu masketir manten: Athos, Porthos, jeung Aramis.[3] Arinyana dina lalakonna ngagagalkeun kudeta ku Kardinal Richelieu anu hayang ngaruntagkeun pamaréntahan Raja Louis ka-13.[3] [3]

Référensi[édit | édit sumber]

  1. a b c d e f g h i Dumas, Alexandre. 1992. Monte Cristo (Tarjamah tina Le Compte de Monte Cristo ku Ermas). Jakarta: Pustaka Jaya. ISBN 979-419-107-8
  2. a b http://www.jakarta.go.id/jakv1/encyclopedia/detail/2053 Archived 2012-01-11 di Wayback Machine, diaksés tanggal 15 Nopémber 2011
  3. a b c d e f http://koran-jakarta.com/index.php/detail/view01/74255, diaksés tanggal 15 Nopémber 2011