Basa Éspéranto

Ti Wikipédia Sunda, énsiklopédi bébas

Basa Éspéranto téh nyaéta basa jieunan nu dijieun ku L. L. Zaménhof dina taun 1887. Ayeuna basa Éspéranto téh basa jieunan nu miboga panutur panglobana. Ari ngaran "Éspéranto" téh nyaéta ngaran samaranna Zaménhof basa anjeunna medalkeun buku kahiji ngeunaan basa ieu, nu ku anjeunna diaranan Lingvo Internacia (Basa Internasional). Tapi ka dieukeunna, panutur basa ieu leuwih resep ka ngaran "Éspéranto" nu hartina "jelema nu miharep". Diaranan kitu sotéh da Zaménhof ngarepkeun yén basa Éspéranto téh bisa jadi basa internasional anu sipatna nétral, nyaéta lain nu sasaha, tapi milik sakumna manusa. Anjeunna ogé nyieun tata basa nu basajan tur teu hésé diapalkeun, ambéh saha waé nu diajarna ngarasa gampang, naon baé basa indungna.

Di Indonésia sorangan, basa Éspéranto kacutat geus aya ti taun 1902[1]. Taun 1950an, basa Éspéranto di Indonésia kaitung maju, ku ayana Asosiasi Éspéranto Indonésia nu harita diasuh ku panutur basa Éspéranto asal Minang, Rangkajo Chailan Sjamsoe Datoe Toemenggoeng. Hanjakalna, taun 1965, ku kaayaan pulitik Indonésia, Éspéranto lir leungit teu tapakan deui. Sanggeus Datoe Toemenggoeng tilar dunya, Asosiasi Éspéranto Indonésia teu aktip deui, tur teu aya deui kontak panutur basa Éspéranto di Indonésia. Tungtungna, dina taun 2009, panutur basa Éspéranto ti Bélgia, Heidi Goes ngawanohkeun deui basa Éspéranto di sababaraha kota di Indonésia. Usahana aya hasilna ogé, da tungtungna taun 2013, digelar Kongrés Basa Éspéranto nu kahiji di Indonésia. Di kongrés éta, dijieun deui Asosiasi Éspéranto Indonésia nu aktip tepi ka ayeuna[2].

  1. "Goes 2008a (Esperanto en Indonezio - 1).pdf". docs.google.com (dalam in). Diakses tanggal 2018-07-27. 
  2. "Sejarah AEI | AEI". www.esperanto.or.id (dalam id-ID). Diakses tanggal 2018-07-27.