Didin S. Bajuri

Ti Wikipédia Sunda, énsiklopédi bébas
Loncat ke navigasi Loncat ke pencarian
Seniman Sunda
Gambar:DidinBajuri.jpg
Wasta:Didin S. Bajuri
Lahir:24 Juli 1946
Pakasaban:Juru mamaos, juru kawih
Papasangan:Mamah Dasimah

Didin S. Bajuri mimiti kataji ku tembang Sunda mangsa manéhna keur masih sakola di Sakola Dasar, alatan pangaruh lingkungan kulawargana. Bapana, R. Bajuri Anggakusumah, sajaba jadi juru lukis ogé jadi juru mamaos. Sajaba guguru ka bapana, Didin réa meunang binaan ti R. Muhammad Sadikin.

Waktu sakola di Sekolah Menengah Pertama, Didin miluan pasanggiri tembang anu diayakeun ku organisasi Putra Sunda sarta hasil jadi jawara. Dina Pasanggiri Tembang Sunda sawewengkon Bogor (1967), Didin meunang pangajén Jawara Kahiji Lalaki. Didin ogé miluan Pasanggiri Tembang Sunda vérsi Damas (1969). Dina Pasanggiri Tembang Sunda sa-DKI Jakarta jeung Jawa Kulon (1970) Didin hasil jadi Jawara Kahiji. Didin ogé miluan Pasanggiri Béntang Radio jeung Televisi Tingkat Jawa Kulon (1982) sarta hasil jadi Jawara Katilu.

Dina widang atikan formal, Didin henteu namatkeun sakolana di Sekolah Menengah Atas. Manéhna saterusna digawé di perkebunan entéh Mégawati, Garut Kidul; tapi ngan tahan tujuh bulan. Manéhna balik deui ka Bogor, tuluy neruskeun sakolana. Di Bogor, manéhna asup ka Sekolah Menengah Olahraga Atas nepi ka junun meunang ijazah. Didin nuluykeun sakolana Pendidikan Guru Sekolah Lanjutan Pertama (PGSLP) Jurusan Basa Indonésia.

béda jeung kasang tukang widang atikan formalna, Didin kalahka digawé di Dines Pekerjaan Umum (PU) Jawa Kulon. Alatan salila tujuh taun ngan dijadikeun tanaga honorér di Dines PU, ahirna Didin kaluar ti PU. Sakaluarna ti Dines PU, Didin digawé di Proyek Cimanuk, Cirebon, tapi di tempat ieu ogé manéhna ngan sakeudeung. Sanggeus kaluar ti proyek Cimanuk. Saprak harita, Didin tumetep di Bandung. Babarengan pamajikanana, manéhna ngokolakeun Lingkung Seni Sasaka Domas, Bandung.

Rékaman kaset tembang Sundana anu munggaran dijieun dina taun 1972 babarengan jeung Euis Komariah, saterusna nyusul jeung Imas Permas sarta Maemunah. Tapi, salaku juru mamaos, boh waktu dina panggung boh di studio rékaman, Didin leuwih mindeng babarengan jeung pamajikanana, Mamah Dasimah.

Didin henteu ngan ngaleukeunan tembang waé, tapi ogé ngaleukeunan kawih. Ngaran Didin ngajaul sanggeus ngaluarkeun albeum kawih anu eusina lagu-lagu ciptaan Nano S. Salah sahiji kawihna anu pangkawentarna nyaéta ”Anjeun” sarta ”Potret Manehna”. Nepi ka kiwari geus ngabéréskeun leuwih ti 30 albeum rékaman.

Tempo ogé[édit | édit sumber]

Rujukan[édit | édit sumber]

  1. Ajip Rosidi, Apa dan Siapa Orang Sunda, Kiblat Buku Utama, Jakarta, 2003

Tumbu kaluar[édit | édit sumber]