Obrolan kategori:Bodor

Buruan Cium Gue !

Lantaran panasaran ka pilem Buruan Cium Gue anu keur heboh lantaran adeganana matak ajol ajolan jajantung, si aki jeung si nini malem minggu kamari indit ka bioskop twentiwan nek lalajo. Dijero bioskop si aki teu ngiceup ngiceup ningali adegan anu keur silih lamot biwir, ari si nini mah jongjong we ngabeuweung borondong garing anu ditempat eta katelahna pop corn tea.

Balik lalajo si aki alewoh nyaritakeun deui adegan anu kungsi ditingali dina pilem eta. " Nini asa kaingetan euy, pan salila urang bobogohan tug nepikeun kasakieu kolotna asana can ngasaan nu ngarana silih lamot biwir teh !" ceuk si aki mimiti kapangaruhan ku adegan pilem. " Enya euy aki...kumaha mun urang nyalingker heula kanu poek !" tembal si nini satengah ngajalanan. Atuh teu diengkekeun deui dua duana terus nyalingker kanu poek. Dinu poek nu kadenge teh ngan ukur sora si nini semu ngaharoshos. " Buruan cium dewek !"

Tilu jam tilu puluh menit tilu puluh detik, si aki jeung si nini kakara ting kulunu tinu poek, pok si aki nanya ka si nini. " Nini....kumaha rasana euy ?" " Ueudaannnn meennnn !" tembal si nini nurutan iklan energy drink. " Niniii...ke..ke....rarasaan teh aya nu melag dina tikoro ?" ceuk si aki semu reuwas bari ngarancetan tikorona. " Puguh nini ge keur reuwas ieu teh...huntu palsu nini luncat kamana nya?" (Kang Syam Ridwan)

Ronaldinho

KLEUP mengbal PS Gigarukgak, di lembur kuring, enyaan aya kamajuan. Pangpangna dina make pamaen asing kawas di PSSI anu nepi ka lima urang dina sakleupna teh. Di PS Gigarukgak ge aya lima pamaen asing: Asep Ronaldinho, Agus Ronaldinho, Maman Ronaldinho, Udin Ronaldinho, jeung Ajat Ronaldinho. Enya, nu asing teh karek ngaranna wungkul, asing kadengena ka ceuli urang lembur mah.

Tapi teu majar kumaha, kapanan Ronaldinho urang Brazil nu ngajukut di kleup Barcelona Spanyol teh kapeto jadi pamaen panghadena sadunya taun 2004. Katurug-turug di Cigarukgak teh loba keneh munding malah pamaen PS Cigarukgak teh lolobana mah leubeut ku pangalaman nunutur bujur munding alias manten budak angon. Meujeuhna we mun loba nu tuturut Ronaldinho teh.Tuda nu ka sebut televisi teh geus teu aneh! Memehna mah ketang nu make ngaran Ronaldinho teh ngan duaan, Si Asep jeung Si Agus. Kitu ge Si Asep mah embungeun diturutan. Apan meh-mehan galungan jeung Si Agus. "Agus maneh mah tong hayang make ngaran Ronaldinho, neangan atuh ngaran sejen, Agus Kurniawan Dwi Yulianto atuh!" ceuk Si Asep ka Si Agus mani ranteng urat beuheungna. "Lain ge pamaen asing atuh ngaran uing disandingkeun jeung Kurniawan mah, beuki nyeni, teu asing teu sing!" tembal Si Agus malik nyureng. "Tapi teu pantes maneh mah make ngaran Ronaldinho, ari nyepak bal teu becus. Mun nyepak bujur munding, saehuna!" "Kehed, ngahina siah ka dewek! Na memangna silaing cocog ngaku ngaran Ronaldinho ari awak sagede munding, lumpat boyot?" segag Si Agus, bari nyerenteng rek ngalabrak Si Asep nu meunang awakna bayuhyuh miyuni munding. Untung we Kang Dadang, palatih PS Cigarukgak gancang nyapih nu rek galungan. "Minggeus montong parasea, pek we rek make ngaran naon wae oge moal aya nu nyaram. Tapi awas maraenna kudu hade, enya-enya kawas Ronaldinho. Minggu hareup urang katatamuan ku PS Cirodek. Latihan sing bener!" ceuk Kang Dadang. Laju nitah pacantel-cantel ka Si Asep jeung Si Agus. "Tuh nya, ceuk Kang Dadang ge. Maneh mah mani usilan pisan Sep!" Si Agus asa meunang. Geus karuhan kitu mah atuh lain ukur Si Asep jeung Si Agus nu make ngaran asing teh. Si Maman, Si Udin, jeung Si Ajat ge make merek Ronaldinho. "Awas Pen, engke dina ngareporteran ulah poho nyebut Ronaldinho euy!" pesen Si Asep ka kuring, bari terus ngaharewos, "Kalem, aya dua bungkus anu tujuh rebuan!" pokna bangun rusiah. Kuring unggeuk rusiah deui. Padahal, Si Agus geus leuwih ti heula nyogok ku cara ngalunaskeun hutang kuring dua puluh rebu perak. Nya kitu deui, Si Maman, najan kawentar tinggar kalongeun tapi keukeuh make ngaran Ronaldinho pedah eta cenah boga seuri kawas Ronaldinho, darehdeh ka wasit najan dibere kartu beureum ge. Malar kuring teu poho nyebut Ronaldinho, manehna nyogok kuring sapuluh rebu perak, ladang kuli macul. Ari Si Udin, najan gede ambek estuning tojaiah jeung pasipatan Ronaldinho, manehna boga andelan ngaranna nu meh sarua lebah Dinho, wancahan tina Udin Holid. Majar teh Ronaldinho hartina rosa nalipak Udin Holid. Minangka tawis kadeudeuh ka kuring sangkan teu poho nyebut Ronaldinho, Si Udin ngancam rek nyekek. Abong nu gede ambek, tawis kadeudeuh disaruakeun jeung tawis kageuleuh. Ari Si Ajat, puguh-puguh ku bapana geus dingaranan Ajat Sudrajat sangkan jago mengbal siga Ajat Sudrajat pamaen Persib manten, keukeuh hayang make ngaran Ronaldinho da eta cenah buukna sarua: Panjang, dibuntut kuda. Si Ajat jangji, mun kuring mindeng nyebut ngaranna nu asing tea najan keur teu mawa bal cenah mah rek mere Si Atikah, adina. Tah ieu nu penting keur kuring mah. "Lain Kang, ari ti PS Cirodek aya pamaen asingan?" Si Asep hariweusweus ka Kang Dadang bangun hariwang. "Wah, gableg pamaen asing ti pedut. Lembur nyeblok jauh ka Brazil!" tempas Si Agas, bari neuteup hangseur ka Si Asep bangun neuteuli. "Teuing atuh," jawaban Kang Dadang heureut. Dina prungna adu jajaten di lapangan Cirungkun nu teu pati lega, nu lalajo noyek kaasup barudak awewe kabogohna lima pamaen asing ti PS Cigarukgak. Paingan atuh ulah kaliwat nyebut ngaran Ronaldinho da eta meureun hayang kapuji ku kabogoh. Munding ge tingaremoh jongjon ngaremus jukut. Kuring geus campego hareupeun mik. Barang narima daptar ngaran ti kleup PS Cirodek, bati olohok. Teu rek kitu kumaha, da puguh ti mimiti kiper tepi ka stiker kabeh pamaen asing, make tambahan ngaran....Ronaldinho. Palatihna, ngomat-ngomatan ulah poho nyebut Ronaldinho, cenah rada ngancam. Leuh, kumaha nyebutanana pamaen asing wungkul kieu mah, mangkaning disiarkeun "live" kana sapeker. Ah, kumaha engke we.