Panél surya suhunan

Panel surya suhunan luhuruen imah

Panél surya suhunan atawa pabangkit listrik fotovolték suhunan mangrupa sistim fotovolték anu ngagunakeun panél surya panghasil listrik nu dipasang di luhureun suhunan wangunan imah atawa struktur wangunan lianna. Rupa komponén dina pamangpaatan panél surya pikeun suhunan kieu téh ngawengku modul fotovolték, parabot sistim pamasangan, kakabelan, invérter surya, sarta aksésori listrik lianna.

Sistim anu dipasang dina suhunan mah leuwih leutik batan pabangkit listrik fotovolték anu dipasang dina taneuh, anu mana kapasitasna bisa nepi kana mégawattna. Da ari sistim fotovolték dina suhunan imah mah biasana kapasitasna téh 5 nepi ka 20 kilowatt (kW), sedengkeun anu dipasang dina wangunan komérsial mah bisa nepi ka 100 kilowatt leuwih.

Pamasangan

Di wewengkon dayeuh mah geus ilahar di wangunan-wangunan téh dijieun kalawan nyayagakeun lowong suhunan anu lega kalawan lénglang, anu mana mangpaatna bisa nyigkahan masalah pamakéan lahan nu kaleuleuwihi sarta nyingkahan masalah-masalah nu patali jeung lingkungan séjénna. Diperkirakeun insolasi suhunan surya téh loba nu mangaruhanana, kurang leuwih ajén insolasi ieu dipangaruhan ku sawatara hal di handap:

• Waktu dina sataun
• Gurat Lintang
• Kaayaan cuaca
• Déngdékna suhunan
• Aspék suhunan
• Kalangkan tina séjén wangunan atawa tatangkalan nu deukeut

Loba téori pikeun ngitung poténsi sistim panél surya suhunan, di antarana ngagunakeun téori Lidar jeung orthophotos. Malah modél anu canggih mah bisa nangtukeun untung rugina pangiuhan dina aréa nu lega pikeun sumebaran panél surya suhunan di hiji kota.

Komponén panél surya suhunan

Di handap ieu mangrupa komponén-komponén anu galib dipaké pikeun ngarakit panél surya suhunan. Sok sanajan desainna mah bisa loba varéasina nyaluyukeun jeung jinis suhunanana, sudut suhunanna, sarta masalah kalangkangna ogé. Komponén-komponén anu geus galib pikeun ngarakit panél surya suhunan di angarana:.

1. Panél Surya, ngasilkeun listrik bébas karbon nalika dicaangan ku cahya panonpoédisinari. Umumna dijieun tina bahan silikon, ieu panél surya téh kasusun tina sél surya anu laleutik anu biasana mah jumlahna 6 sél per panél. Sawatara panél surya dirangkéy ngabentuk susunan surya. Panel surya umumna dilindungan ku kaca témpéréd sarta diamankeun dijagaan ku elis aluminium. Bagéan hareup panél surya mah tahan lila pisan, sedengkeun bagéan tukangna mah leuwih ririwit.
2. Klém pamasangan, umumna mah ngawenngku brakét aluminium jeung baud stainless steel anu fungsina pikeun ngamankeun panél surya hiji jeung panél surya lianna nalika dipasangkeun kana rél di luhureun suhunan. Klém loba rupa desainna pikeun ngitungkeun rupa-rupa pangaturan dina suhunan jeung rélna éta.
3. Rak jeung rél, dijieun tina logam jeung sok diteundeun dina pangaturan paralél na suhunanana téh hambéh panélna bisa diterapkeun ka dinya. Penting kacida supaya rélna rata sangkan panélna ogé dipasangna jadi rata.
4. Dudukan pamasangan rél jeung sakumna susunan kana beungeut suhunan. Ieu dudukan biasana mah mangrupa léter L anu dibaud maké pamipaan sarta kana para suhunan. Dudukanana loba vaéasi desainna lantara ngaluyukeun jeung kondisi sarta bahan suhunanna.
5. Flashing mangrupa pelat logam tahan lila nu nyayagakeun ségel tahan cai antara dudukan jeung beungeut suhunan. Mindeng pisan ngagunakeun dempul pikeun nutupan flash nu kana suhunan sangkan katempona saru.
6. Kabel AC/DC pikeun invérter anu nyambungkeun kabel antara panél jeung kana invérter mikro atawa invérter string. Ulah aya kabél anu antel kana beungeut suhunan atawa ngagantung kaluar, tujuanna sangkan kabelna teu téréh regas.
7. Invérter mikro dipasangna dina handapeun panél anu fungsina pikeun ngarobah daya DC tina panél jadi daya AC anu bisa dikirim kana. Invérter mikro ngamumkinkeun optimalisasi unggal panél nalika ayana kalangkang sarta optimalisasi data spésifik tina panélna séwang-séwangan.

Sistim hybrid

Pabangkit listrik fotovolék suhunan kieu, boh nu dina jaringan boh luareun jaringan, bisa dibarungkeun pamakéanana jeung sumber daya listrik lianna kayaning generator disel, pabangkit listrik tanaga cai, pabangkit listrik tanaga angin, listrik PLN, bateré, jeung sajabana ti éta. Sistim tanaga hibrida surya téh meureun bisa nyayagakeun sumber daya listrik anu nutuluyan.

Kauntungan

Kauntungan dina masang pabangkit listrik tanaga surya na suhunan, salah sahijina nyaéta bisa neken biaya pamakéan listrik sapopoé. Lantaran sagemblengna ieu pabangkit listrik tanaga surya téh éstu ngamangpaatkeun cahya panonpoé. Malah mah tina leuwihna pasokan listrik téh bisa disimpen kana aki, sangkan di mana sawaktu-waktu diperlukeun téh kari dipaké baé. Jeung deuih kaleuwihan tina pasokan listrik hybrid téh di Indonésia mah bisa diasupkeun ka listrik PLN, sahingga KWh méter téh ngitung mundur atawa itungan bebanna jadi ngurangan, minangkana mah tabungan daya ka listrik PLN.