Widi Mulia

Widi Mulia

Widi Mulia nyaéta urang Sunda nu jadi juru kawih sarta pamaén film Indonésia. Ngaranna dipikawanoh salaku salah saurang anggota grup musik AB Three.

Kariér

Nyanyi

Ti mimiti leutik kénéh Widi geus mindeng miluan pasanggiri nyanyi. Puncakna nyaéta waktu meunang hiji sési dina kontés Asia Bagus Monthly Championship di Singapura dina taun 1993. Younky Soewarno, saurang musisi nasional, anu katarik ati ku pangabisana dina oleh vokal, saterusna ngajak cikal 3 sadulur ieu pikeun nyieun trio babarengan Nola jeung Lusi. AB Three kabentuk dina tanggal 13 Agustus taun 1993. Babarengan jeung dua baturna dina AB Three (mimitina jeung Nola sarta Lusi, saterusna jeung Nola sarta Cynthia, Widi geus ngaluarkeun 5 albeum.

Maen filem

Sajaba ti nyanyi, Widi ogé boga pacabakan dina dunya filem. Widi munggaran maén filem dina sinetron Sahabat Pilihan waktu manéhna masih di SMP. Satuluyna manéhna maen filem dina Mahadaya Cinta (2005).Widi ogé milu maén drama musikal nu judulna Kupu-kupu Malam.

Widi ogé maén dina filem carita leupas (FTV) nu judulna Sayekti dan Hanafi. Malah mah ku lalakonna salaku Sayekti, ngaran juru kawih nu camperenik ieu asup kana daptar nominasi pamaén utama pangalusna FFI 2005. Dua taun satuluyna, Widi maén dina filem layar rubak wanda horor, Lantai 13 (2007). Dina filem anu disutradaraan ku Helfi Kardit ieu, Widi maén babarengan jeung Ariyo Wahab sarta Virnie Ismail.

Kahirupan pribadi

Widi ngadahup ka Dwi Sasono ping 4 Nopémber 2007. Widi jeung Dwi kungsi papacangan keur mangsa di SMA 5 Cibubur.

Albeum (Babarengan AB Three)

• Cintailah Aku (1995)
• Kerinduanku (1997)
• Nyanyian Cinta Kamu (1999)
• Auraku (2002)
• Selamat Datang Cinta (2006)

Sinetron

• Sayekti dan Hanafi

Filmography

• Lantai 13

Tumbu kaluar

• Profil [1] Archived 2010-03-23 di Wayback Machine di Kapanlagi.com