Goong

Ti Wikipédia, énsiklopédia bébas
Luncat ka: pituduh, sungsi
Goong Gantung

Goong nya éta salah sahiji waditra takol dina perangkat gamelan pélog, saléndro atawa degung[1]. Pungsi goong nya éta minangka panutup nada[1]. Ngaran goong mangrupa hasil tina sora éta waditra sorangan, lamun ditakol sorana Gong[1]. Goong miboga bentuk nu panggedéna lamun dibandingkeun jeung waditra séjén saperti bonang jeung jenglong. Goong miboga sababaraha bentuk diantarana: goong gantung, goong buyung, goong tiup, goong bendé, jsté[2]

Bahan jeung Rancang Wangun[édit | sunting sumber]

Goong gantung[édit | sunting sumber]

Goong gantung miboga bentuk buleud, miboga penclon anu dijieun tina logam beusi atawa perunggu. Ukuran diamétérna 90-105cm[2][1]. Penclonna miboga diamétér 7-10cm[2][1]. Papasingan bagian goong diantarana: Raray goong nya éta bagian sakuriling penclon; Manis raray nya éta bagian sakuriling raray; taktak nya éta bagian sakuriling manis raray; awak nya éta awak goong anu ukuranna 8-12cm; nu terahir nya éta lalambé mangrupa bagian goong nu handap[1].

Goong Buyung[édit | sunting sumber]

Goong buyung nya éta goong anu dijieun tina perunggu atawa beusi, benetukna mangrupa wilahan anu dibagian tengahna miboga penclon[1]. Disebut goong buyung sotéh lantaran resonator/ gema sorana dijieun tina buyung atawa gentong wadah cai. Kaayeunakeun resonator goongna sok dijieun tina kai[1]. Di Daérah Karawang atawa Bekasi goong buyung disebut Goong Angkog[1].

Goong Tiup[édit | sunting sumber]

Goong tiup nya éta goong anu dijieun tina awi gombong, diaménkeun kucara ditiup[1][2]. Pungsina bisa jadi goong gedé jeung goong leutik (kempul)[1]. Gedé-leutikna sora gumantung kana cara ngésér jeung ngatur panyocok nu aya dina awi[1].

Ragam Hias[édit | sunting sumber]

Ilaharna goong gantung anu boga ragam hias mah[1]. Ragam Hiasna ogé ngan aya dina kakanco (paragi ngagantungkeun goong) wungkul, dianatarana: oray naga mangrupa simbul bujangga; Lauk mas mangrupa simbul kamakmuran; Kalamakara/Raksasa mangrupa simbul Katabahan jeung kakuatan pikeun nyingkahan sabangsaning iblis[1].

Cara Nabeuh[édit | sunting sumber]

Hampir sakabéh jenis goong dimaénkeun kucara ditabeuh maké panakol husus[1]. Ngan sok béda-béda posisi nakolna, misal goong gantung mah ditakol ka arah gigir, ari goong buyung mah ditakol ka arah handap kawas nakol jenglong[1]. Alat panakolna buleud, dibungkus ku kaén manglapis-lapis, dicekel ku leungeun katuhu, ditakolkeun ka penclonna[1]. Goong leutik (kempul) jeung goong buyung mah kudu diténgkép maenkeunana, ngarah sorana teu panjang teuing[1].


Referensi[édit | sunting sumber]

  1. a b c d e f g h i j k l m n o p q r Kubarsah. R, Ubun.1994.Waditra : mengenal alat-alat kesenian daerah Jawa Barat.Bandung:Beringin Sakti
  2. a b c d Rosidi, Ajip, Spk.2000.Énsiklopédi Sunda: Alam, manusia, dan budaya termasuk Budaya Cirebon dan Betawi.Jakarta:Pustaka Jaya.
Nulis.jpg