Senam irama

Ti Wikipédia Sunda, énsiklopédi bébas


Kagiatan senam irama

Senam irama mangrupa rangkaian gerak senam nu dilakukeun ku gerakan léngkah-léngkah sarta ayunan leungeun jeung sikep awak nu dibarengan ku hiji irama atawa musik.[1] Senam irama nyaéta bentuk-bentuk gerakan senam nu mangrupa gabungan antara sababaraha bentuk gerakan jeung irama nu marenganana.[2] Misalna saperti irama tepukan, ketukan, tamboré, nyanyian, musik jeung réa-réa deui.[2] Kaéndahan gerakan, nyiptakeun variasi gerakan, jeung ngabentuk gerakan ngaliwatan koordinasi antara sababaraha gerakan jeung irama mangrupa tungtutan dina senam irama.[2] Bisa ogé disebutkeun yén nu jadi prinsip dasar tina gerakan-gerakan senam irama nyaéta ayana kalentukan awak dina ngalakukeun gerakan jeung kasinambungan antara gerakan nu hiji jeung gerakan lianna saluyu jeung irama nepi ka jadi runtuyan gerak nu ngahiji antara gerakan jeung irama nu dilakukeun sacara luwes jeung lancar.[2]

Sajarah senam irama[édit | édit sumber]

Jalma nu boga jasa dina senam irama nyaéta J.J.Dalcroze, saurang musikus nu nendeun panitén gedé kana hubungan antara gerak jeung musik.[2] Ku lantaran Dalcroze saurang guru musik, nu ditonjolkeunana ngeunaan rasa musik ti batan gerakan.[2] Jadi R.Bode saurang guru pendidikan jasmani jeung salaku murid Dalcroze terus mekarkeun senam musik.[2] Kamekaran senam irama mimiti aya babarengan jeung ayana parobahan dina seni panggung, seni musik, jeung seni tari kira-kira taun 1865-1950.[2]

Rupa-rupa senam irama[édit | édit sumber]

Nu dimaksud rupa-rupa senam irama nyaéta ngeunaan rupa-rupa bentuk gerakan dina senam irama nu ngawengku ; rupa-rupa gerakan leungeun, rupa-rupa gerakan suku, jeung rupa-rupa kombinasi antara gerakan suku jeung leungeun.[2]

Referensi[édit | édit sumber]

  1. Pengertian Senam Irama diakses tanggal 05 November 2011
  2. a b c d e f g h i Syarifuddin, Aip dan Muhadi.1991.Pendidikan Jasmani dan Kesehatan. Jakarta:Depdikbud. Halaman 117