Dapur

Ti Wikipédia Sunda, énsiklopédi bébas
Dapur di Kampumg Naga

Dapur (basa wewengkon brebes: goah) atawa pawon nyaéta rohangan imah nu di tukang, paranti mirun seuneu, masak, nyangu jsb.[1][2][3] Baheula mah dapur biasana mangrupa sorondoy atawa sosompang tina badan imah panggung.[3] Bagian-bagian dapur aya parako jeung hawuna, para seuneu sarupa lalangit pikeun neundeun hasil palawija nu digaringkeun.[3] Sacara tradisi rohangan dapur ngahiji jeung goah .[3] Nalika beurang supaya rohangan dapur caang dibéré tidak (hiji atawa opat kenténg dibuka supaya cahaya matapoé asup) atawa maké sababaraha kenténg kaca.[3] Dina kamekaranana, dapur biasa maké gandela eram kawat, atawa sarigsig keur tempat asup kaluar; aya ogé anu hateupna maké badak heuay.[3][4]


Jenis Dapur[édit | édit sumber]

1.Dapur baseuh, jenis dapur ieu dipiboga ku sakabéh imah.[5] Ciri-ciri dapur baseuh di antarana;a) miboga rohangan anu leuwih lega jeung biasana aya di béh tukang, b) deukeut jeung sumber cai atawa tempat husus keur kukumbah, c) aya parabot masak jeung parabot dapur anu lengkep saperti kompor jeung parabot masak lianna, d) jenis dapur baseuh ieu fungsina keur tempat ngolah kadaharan, kukumbah, sarta prosés masak, e) jenis dapur baseuh leuwih babari kotor jeung baseuh.[5]

2. Dapur garing,Teu sakabéh imah miboga jenis dapur garing.[5] Salian ngabutuhkeun rohangan tambahan, pikeun nyieun jenis dapur garing ogé diperlukeun biaya leuwih nalika nyieun désain jeung bentuk tina jenis dapur ieu.[5] Saenyana fungsi utama tina dapur garing ieu rada sarua jeung rohangan makan.[5] Ngan bédana, dina jenis dapur garing ieu aya parabot ringan lianna siga pamanas makanan atawa microwave, kompor induksi atawa parabot keur nyieun inuman.[5] Jenis dapur garing ieu lain keur tempat ngolah kadaharan atawa masak.[5] Jenis dapur gering ieu leuwih sering digunakeun keur tempat kumpulna sakabéh kulawarga.[5]

Rujukan[édit | édit sumber]

  1. Jonathan, Rigg (1862). A Dictionary of the Sunda Language of Java. Universitas Harvard: Bataviaasch Genootschap van Kunsten en Wetenschappen. 
  2. Taufik Hidayat, Rachmat Spk.2007. Peperenian Urang Sunda. Bandung:PT. Kiblat Buku Utama. Halaman 18
  3. a b c d e f Rosidi,Ajip. 2000. Ensiklopedi Sunda, Alam, Manusa, dan Budaya termasuk Budaya Cirebon dan Betawi. Jakarta:Pustaka Jaya. Halaman 178
  4. Anwar, Hafizh A. Nugraha, Hendi (2013). Rumah Etnik Sunda. Jakarta: GRIYA KREASI. p. 1. ISBN 9789796612116. Diakses tanggal (disungsi – 22 Mei 2020). 
  5. a b c d e f g h Jenis Dapur Archived 2011-11-11 di Wayback Machine diakses tanggal 02 November 2011