Nyi Roro Kidul
Nyi Roro Kidul, atawa Kangjeng Ratu Kidul nyaéta hiji tokoh mitos nu dipercaya ngawasa Laut Kidul.[1] Ieu kapercayaan dipimilik ku masarakat pulo Jawa jeung Bali.[1]
Mitos Nyi Roro Kidul
[édit | édit sumber]Kacaritakeun hiji putri geulis ngaranna Kadita.[2] Alatan kageulisanana, manéhna disebut Déwi Srangéngé. Déwi Srangéngé téh anak ti Raja Munding Wangi Sanajan miboga putri nu kacida geulisna, Sang Raja tetep sedih lantaran manéhna mah mikahayang budak lalaki. Lantaran kitu, raja téh nikah deui ka Déwi Mutiara nepi ka boga budak lalaki. Déwi Mutiara hayang anakna jadi raja, nepi ka manéhna narékahan sagala rupa sangkan hal éta bisa tinekanan. Tuluy Déwi Mutiara ngadatangan raja sarta méré dih sangkan raja nitah Déwi Srangéngé indit ti istana. Tapi raja nolak kana paménta Déwi Mutiara. Teu nepi ka dinya waé tarékah Déwi Mutiara téh, isukna manéhna nitah abidna indit ka dukun sangkan ngaguna-guna putri Kadita. Peutingna awak Kadita geus pinuh ku bisul sarta borok. Nalika hudang, manéhna kacida reuwaseunana alatan awakna bau tur pinuh ku borok. Nalika raja apaleun ngeunaan kaayaan anakna nu kitu, manéhna kacida sedihna nepi ka ngadatangkeun kabéh tabib pikeun ngubaran panyakit anakna. Tapi éta panyakit téh teu cageur waé, antukna raja nitah Kadita indit ti istana alatan manéhna embung Kadita jadi bahan omongan di sakuliah negeri. Putri Kadita indit bari ceurik. Teu nyaho kudu ka mana pilampaheunana. Ampir tujuh poé tujuh peuting lalampahan manéhna nepi di Laut Kidul. Tuluy manéhna ngajleng ka jero laut. Éta cai laut nyageurkeun panyakit Kadita nepi ka antukna mah Kadita jadi pangawasa laut kidul tur meunang jujuluk Nyi Roro Kidul.
Makam Roro Kidul
[édit | édit sumber]Di Pelabuhan Ratu aya makam nu dipercaya jadi makam Nyi Roro Kidul. Perenahna 20 km ti Pelabuhan Ratu, nyaéta di basisir Karang Hawu. Di ieu makam ogé aya rohangan husus nu didominasi ku warna beureum, tur aya lukisan gedé nu ngagambarkeun Nyi Roro Kidul. salian ti éta di gigireun makam Nyi Roro Kidul aya ogé makam Eyang Jalah Mata, Eyang Sanca Manggala jeung Eyang Syeh Husni Ali.
Hajat Laut
[édit | édit sumber]Masyarakat pamayang di basisir beulah kidul biasana ngalaksanakeun hajat laut minangka ébréhan rasa sukur tur nganuhunkeun ka Nyi Roro Kidul réhna geus ngabantuan ngaronjatkeun panghasilan. Ieu upacara biasana dilakukeun di Pelabuhan Ratu, Ujung Genteng, Pangandaran, Cilacap, jeung Sukawayana.
Referensi
[édit | édit sumber]- ↑ a b Nyi Roro Kidul Archived 2016-03-04 di Wayback Machine (Diakses tanggal 31 Oktober 2011) (id)
- ↑ Dewi Srangenge (Diakses tanggal 31 Oktober 2011) (id)
|
Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |