Pilot

Ti Wikipédia Sunda, énsiklopédi bébas
Pikeun harti lianna Pilot, tempo Pilot (disambiguasi).

Pilot nyaéta sesebutan keur jalma nu ngamudikeun kapal hiber. Minangka profesi nu nungtut kaahlian/kaparigelan dina nyupiran kapal hiber, pilot kudu hasil ngaliwatan ujian resmi nu diayakeun ku sakola penerbangan. Lamu lulus dina ujiannana, pilot bakal meunang sértifikasi hiber, nyaéta surat pangakuan kamampuhan pilot keur ngahiberkeun pesawat nu mibanda tipe/ukuran tinangtu.

Kaparigelan pilot dina ngahiberkeun pesawat komersial mangrupa dasar utama nu nangtukeun kualitas hiji pilot. Faktor-faktor pangrojong keur kaahlian pilot lian ti surat sertifikasi nyaéta jumlah jam hiber nu geus dipiboga. Kasalametan hiji penerbangan mangrupa tanggung jawab pilot.

Dina tugasna di jero kokpit pesawat, pilot dibantu ku ko-pilot. Salila penerbangan lumangsung ti mimiti take off nepi ka landing, pilot jeung ko-pilot kudu taat kana jalur-jalur penerbangan nu geus diprogram ngaliwatan bantuan navigasi pesawat sarta ngilu kana informasi nu dibikeun ku munara kontrol lalu-lintas bandara.

Dina sajeroning penerbangan komersial, pilot jeung ko-pilot tugas ngamudikeun pesawat sedengkeun pramugari jeung pramugara tugasna ngaladenan sagala kabutuhan para penumpangna. Pilot, ko-pilot jeung pramugari/pramugara mangrupa awak kabin pesawat.

Sawala nu dilakukeun ku pilot, ko-pilot jeung petugas munara kontrol lalu-lintas ti jeung ka hiji bandara bakal direkam dina kotak hideung.