Yamaha Aérox

Ti Wikipédia Sunda, énsiklopédi bébas
Yamaha Aérox
Informasi
ProdusenYamaha Indonesia Motor Manufacturing
Masa produksi1997 - kiwari
Bodi & rangka
KelasSkuter métik
Penyalur daya
Mesin/ÉnjinLiquid cooled 4 Stroke, SOHC, VVA (Variable Valve Actuation)
TransmisiCVT
Dimensi
Jarak sumbu roda1.350 mm
Panjang1.990 mm
Rubak700 mm
Tinggi1.125 mm

Yamaha Aérox nyaéta skuter pabrikan Yamaha anu geus diproduksi ti taun 1997.[1] Ieu Yamaha Aérox mimitina mah husus dipasarkeun pikeun nagara-nagara Éropa,[1] kalawan téhnologi 2-tak, kapasitasna 50cc, sarta mesinna anu sasilinder.[2] Sanajan kitu, ieu Yamaha Aérox geus nerapkeun sistem paniis cairan.[2] Di Indonésia, Aérox makalangan di pasar otomotif téh kira awal taun 2016.[3] Harita modél nu mimiti diproduksi nyaéta Aérox 125LC anu téhnologina geus 4-tak, ieu kaasup Aérox generasi katilu tina runtuyan generasi-generasi Aérox nu geus diproduksi ku Yamaha.[3] Saprak diluncurkeun éta Aérox 125LC langsung diresmikeun jadi paddock bike Yamaha Racing Team Indonesia,[4] padahal di Éropa mah ieu Yamaha Aérox geus diandel ti baheulana minangka paddock bike tim Yamaha MotoGP.[5]

Generasi munggaran[édit | édit sumber]

Generasi munggaran Yamaha Aérox nu miboga kode ngaran YQ50 jumeneng ti taun 1997 nepi ka taun 2013[6], kalawan saeutik parobahan mangsa taun 2003 jeung 2008, sarta kungsi aya sawatara modél husus anu rada béda.[7] Ieu skuter téh mibanda ukuran mesin 49 cc, anu mana jenis mesinna téh sasilinder kalawan masih kénéh sistem 2 tak.[8] Kacatetkeun yén ieu skuter métik Aérox generasi awal téh ngonsumsi béngsin 2,71 liter per 100 km,[9] jeung deuih mun dipinuhan mah éta téngkina téh bisa ngawadahan 7 liter bahan béngsin.[10]

Generasi kadua[édit | édit sumber]

Dina taun 2013 Yamaha tuluy ngaluarkeun Aérox kalawan desainna nu rombak sagemblengna. Dina Generasi kadua ieu skuter Aérox téh dibéré ngaran Aérox R 50 atawa NS50.[11] Lian ti Aérox R 50, Yamaha ngaluarkeun ogé Aérox R 50 Naked atawa NS50N.[12] Nu ngabedakeun antara Aérox R 50 jeung Aérox R 50 Naked téh nyaéta dina palebah setangna.[13] Ari Aérox R 50 mah setangna standar, sedengkeun Aérox R 50 naked mah setangna downhill.[13]

Bagian speedométer Aérox R 50 jeung Aérox R 50 Naked ngagunakeun anu digital nu kawilang anyar, sarta jokna leuwih badag sarta nonjol tinimbang generasi saméméhna mah.[13] Dina bagian mesin, boh Aérox R 50 boh Aérox R 50 Naked masih kénéh 50 cc kapasitasna, tegesna mah 49,2 cc.[11][12] Jenis mesinna ogé masih kénéh sasilinder kawas Aérox generasi munggaran.[11][12] Ngan dina jenis mesin dumasar pabakaranna, boh Aérox R 50 boh Aérox R 50 Naked geus nyayagakeun dua pilihan, nyaéta aya nu 2 tak, ogé aya nu 4 tak.[11][12] Satuluyna, lantaran lumakuna kontrol knalpot Euro-4, Yamaha Aérox kur nyayagakeun anu 4 tak hungkul kalawan ngaran Aérox 4 saprak modél kaluaran taun 2018.[14] Ku kituna Aerox Naked dianggeuskeun nu hartina ieu skuter Aérox kur sayaga anu setangna standaran hungkul.[15]

Generasi katilu[édit | édit sumber]

Motor Yamaha Aérox nu geus maké sistem paniis likuid sarta geus 4-tak jeung mesinna ogé geus dua silinder satuluyna diluncurkeun di Indonésia.[16] Diluncurkeunna ngagunakeun ngaran Aérox 125 LC, nu harita di bulan Januari taun 2016.[16] Ieu modél Yamaha Aérox 125 LC mangrupa modél anu ngahaja diproduksi ukur diajangkeun pasar Indonésia hungkul, sarta diklaim mangrupa konsép anu kawilang powerful na mangsa harita.[17] Lantaran tadi téa, dina ieu model Yamaha Aérox geus geus 4-tak sarta kapasitas mesinna geus 125cc.[17] Ogé geus nerapkeun sistem paniis likluid, pangpangna dikategorikeun powerful téh nyaéta daya maksimumna ieu Yamaha Aérox anu nepi kana 8,4kW (11,2PS) / 9000 rpm.[17] Mémangna ogé ieu Yamaha Aérox 125 LC téh mimiti dipasarkeunna di Indonésia kira awal bulan di taun 2016, ngan deudeuh teuing kur lumangsung 10 bulan.[18] Satuluyna mah produksi Yamaha Aérox 125 LC téh dieureunan, sabab geus aya panggantina nyaéta Yamaha Aérox 155.[18]

Generasi kaopat[édit | édit sumber]

Motor Yamaha Aérox generasi kaopat ieu boga ngaran husus nyaéta Yamaha Aérox 155 VVA.[1] Dina ieu generasi, kapasitas mesin ditingkatkeun jadi 155cc, mangrupa kapasitas anu kawilang badag tinimbang generasi saméméhna, kalawan dilengkepan ku téhnologi VVA (Variable Valve Actuation) nu mana méré tarikan mesin nu leuwih tanagaan.[19] Ogé dilengkepan ku "Forged Piston & DiAsil Cylinder" anu tohaga sarta hampang, sahingga performa mesin leuwih maksimal. Ogé dilengkepan ku SMG (Smart Motor Generator) nu ngajadikeun sora motor leuwih rencep nalika dihirupan téh.[19]

Dina perkara panyaangan, ieu motor Yamaha Aérox 155 VVA geus ngagunakeun lampu LED anu didisain sangkan gaya pisan, sarta dina fungsi nyaanganana ieu lampu kawilang leuwih caang tinimbang lampu motor bohlam biasa jeung leuwih awét umur pamakéanana.[19] Ukuran ban hareup ieu motor nyaéta 110/80-14 inci, sedengkeun ban tukangna ukuran 140/70-14 inci.[19] Ku sabab proporsi ban ieu motor nu kawilang mantes, ngajadikeun pidangan ieu motor téh katémbong leuwih gaya, jeung teu saukur gaya, tina proporsi ban éta téh méré pangalaman numpak kandaraan nu leuwih stabil nalika dipakéna.[19]

Ieu motor Yamaha Aérox 155 VVA geus ngagunakeun Speedometer Full Digital MID (Multifunction Information Display) anu modérn sarta informatif pikeun pangandara ieu motor.[19] Anu mana warna kasangtukang speedometerna béda-béda pikeun séwang tipeuna.[19] Sarta diwuwuhan ogé pangeusi daya parangkat nu disebut Electric Power Socket, sangkan ngecas parangkat sélular jeung sajabana téh jadi leuwih praktis.[19] Ogé kapasitas bagasi didisain leuwih lega, sahingga bisa muat hélm full-face jeung sagala parabot kandaraan lianna.[19]

Rujukan[édit | édit sumber]

  1. a b c "Lahir 1997, Yamaha Aerox Ternyata Ada 4 Generasi". SINDOnews.com (dalam id-ID). Diakses tanggal 2020-01-14. 
  2. a b "Yamaha Aerox 50 Technical Specifications - Ultimate Specs". www.ultimatespecs.com. Diakses tanggal 2020-01-14. 
  3. a b "Yamaha Aerox 125 LC Akhirnya Diproduksi di Indonesia | Otomotif". Bisnis.com. Diakses tanggal 2020-01-14. 
  4. Liputan6.com. "Yamaha Racing Team Indonesia Perkenalkan Paddock Bike". liputan6.com (dalam Indonesian). Diakses tanggal 2020-01-14. 
  5. Sports, Dorna. "Yamaha Motor Europe renews fleet of official MotoGP™ paddock scooters to Dorna Sports | MotoGP™". www.motogp.com. Diakses tanggal 2020-01-14. 
  6. "Yamaha Aerox Yq50 Owner'S Manual". www.manualslib.com. Diakses tanggal 2020-01-14. 
  7. "Yamaha Yq50 Aerox Sp55 Special Edition". suprememotos.com. Diakses tanggal 2020-01-14. 
  8. "2006 Yamaha YQ 50 Aerox R". bikez.com. Diakses tanggal 2020-03-01. 
  9. "Gasoline consumption: 2,71 l/100km - Yamaha, Aerox, YQ50". www.spritmonitor.de. Diakses tanggal 2020-03-01. 
  10. "Yamaha Aerox R 50 Technical Specifications - Ultimate Specs". www.ultimatespecs.com. Diakses tanggal 2020-03-01. 
  11. a b c d "2013 Yamaha Aerox R 50". bikez.com. Diakses tanggal 2020-03-01. 
  12. a b c d "2013 Yamaha Aerox R Naked 50". bikez.com. Diakses tanggal 2020-03-01. 
  13. a b c "Yamaha Aerox Naked 2016 - Features and Technical Specifications". www.yamaha-motor.eu. Diakses tanggal 2020-03-01.  Archived 2020-03-01 di Wayback Machine
  14. Liputan6.com. "Knalpot SC Project Penuhi Standar Euro4". liputan6.com (dalam Indonesian). Diakses tanggal 2020-03-01. 
  15. "Yamaha Aerox Naked 2014 - Features and Technical Specifications". www.yamaha-motor.eu. Diakses tanggal 2020-03-01.  Archived 2020-03-01 di Wayback Machine
  16. a b Media, Kompas Cyber. "Yamaha Luncurkan "Skutik Balap" Aerox 125cc". KOMPAS.com (dalam Indonesian). Diakses tanggal 2020-05-16. 
  17. a b c "Yamaha Aerox 125 LC Akhirnya Diproduksi di Indonesia | Otomotif". Bisnis.com. Diakses tanggal 2020-05-16. 
  18. a b Rahadiansyah, Rangga. "Ada Aerox 155, Aerox 125LC Disuntik Mati". detikoto (dalam id-ID). Diakses tanggal 2020-05-16. 
  19. a b c d e f g h i "Yamaha Aerox 155 VVA Tawarkan Sensasi Berkendara Sexy dan Classy". www.yamaha-motor.co.id. Diakses tanggal 2020-10-18.