Candi Pawon

Ti Wikipédia Sunda, énsiklopédi bébas

Candi Pawon nyaéta hiji candi nu aya di antara Candi Borobudur jeung Candi Mendut, kurang leuwih 1750 méter ti Candi Borobudur sarta 1150 méter ti Candi Mendut. Candi ieu mulai dipugar taun 1903.

Tacan aya bisa mastikeun kunaon ngaranna Pawon. J.G. de Casparis ngira-ngira yén Pawon éta asalna tina basa Jawa Awu (lebu) jeung awalan pa sarta ahiran an nu hartina tempat awu (tempat lebu). Ku sabab éta, arkéolog ieu nganggap yén candi ieu baheulana dipaké pikeun meuleum mayit jadi lebu. Lamun ditempo tina tempatna, candi ieu aya di désa Brojonalan nu lamun dina basa Sangsakerta mah vajra hartina pakarang sarta anala hartina seuneu.

Dina jero candi henteu kapanggih ayana arca. Nu bisa dititénan tina ieu candi nyaéta ukirannana. Dina témbok luar aya réliéf tangkal Kalpataru nu diapit pundi-pundi jeung kinara-kinari (mahluk kayangan, sirahna manusa awakna manuk).