Dwi Bahasa

Ti Wikipédia Sunda, énsiklopédi bébas

Dwi Bahasa atawa Dwibasa, disebut ogé bilingualism atawa multilingualism nyaéta fénoména kabasaan anu ilahar di saban nagara sakuliah dunya. Copélna, nepi ka kiwari 50-70 persén tina jumlah manusa di sakuliah dunya kaasup masarakat bilingual, anu ngagunakeun dua atawa leuwih basa dina komunikasi jeung papadana. Satadina, konsép dwi bahasa téh digunakeun sacara umum pikeun jalma nu ngawasa dua atawa leuwih tina basa. ka dieunakeun, éta konsép téh diheureutan. Ukuran masarakat dwi bahasa lain ditilik tina kamampuh linguistikna sacara pribadi kana basa waé, tapi leuwih jauhna ningali pamakéan (jihat pragmatis) masarakat kana éta basa. Tegesna, anu ngawasa sababaraha basa, tacan tangtu disebut dwi bahasa saupama dina kahirupan sapopoéna masih ngagunakeun hiji basa. Urang Sunda kaasup kana masarakat dwi bahasa, alatan dina hirup kumbuhna teu bisa ngaleupaskeun dirina tina basa Indonésia minangka basa resmi nagara.