Gedung Yayasan Pusat Kebudayaan

Ti Wikipédia Sunda, énsiklopédi bébas
Loncat ke navigasi Loncat ke pencarian

Gedung Yayasan Pusat Kebudayaan (YPK) perenahna aya di Jl. Naripan No.7 Bandung mangrupa salah sahiji gedung tempat pintonan seni kayaning wayang golék, tembang, tari tradisional Sunda, téater, pasanggiri, paméran lukisan atawa seni rupa lianna.[1] Gedung YPK mindeng ogé dipaké pikeun latihan kasenian, seminar, kongrés, rapat, lawungan, diskusi kabudayaan, acara paturay tineung, nepi ka taun 1980-an mah éta gedung téh diséwakeun ka masarakat umum pikeun hajatan jatukrami lantaran waragad akomodasina nu kawatesanan.[1] Sabagéan tina rohanganana kiwari dijadikeun réstoran.[1]

Sajarahna[édit | édit sumber]

Ieu gedung ngaran mimitina nyaéta Villa Evangeline.[2] Taun 1904 ieu gedung dipaké kantor badan hukum NV Javaansche Boekhandel en Drukkerij en handel in schrijfbehoeften “Medan Prijaji”.[2] Badan hukum nu dijieun ku RM Tirto Adhi Soerjo (1878-1918) medalkeun koran “Medan Prijaji”.[2] Koran nu disarungsum dina basa Malayu éta medal munggaran dina taun 1907 mimitina mah mangrupa koran mingguan sarta medal di Bandung.[2] Tilu taun ti harita, éta koran medal unggal poé iwal ti Juma’ah, Minggu, jeung poé-poé gedé.[2] Nalika jaman Walanda, Gedung YPK mangrupa Sositét (Balé Palawungan) nu dingaranan Ons Genoegen.[1] Tempat maén bilyar, catur, maén kartu, sarta tempat nongton hiburan nu biasana mangrupa orkés leuleutikan.[1] Dina taun 1930-an, para tokoh pulitik nasional kayaning Bung Karno saparakanca mindeng ngayakeun vergadering (rapat) di ieu tempat.[1]

Salasahiji kagiatan nu kungsi diayakeun di YPK

Dina périodeu 1950-1980, Gedung YPK kungsi jadi tempat para budayawan Bandung kayaning Seniman Teater Jim Liem (Jim Adilimas), Suyatna Anirun jeung anggota “Studiklub Teater Bandung” (STB); sastrawan Ajip Rosidi, Rustandi Kartakusumah, Rahmatullah Ading Affandie (RAF), jeung réa-réa deui.[1] Kantor LBSS museur di wangunan utama, sedengkeun kantor Surat Kabar Warta Bandung jeung Majalah Sunda kungsi museur di salah sahiji bagéan rohangan di YPK.[1] Dina périodeu 1960-1990 sawatara koran di Bandung kungsi museur di ieu gedung misalna waé Warta Bandung, Harian Berdikari, jeung Bandung Pos.[2] Salian ti éta, gedung YPK ogé dijadikeun alamat sekretariat sawatara Paguyuban Seni jeung Budaya, misalna waé Caraka Sundanologi.[1] Gedung YPK nu kungsi jadi kantor "Medan Prijaji” ieu kiwari jadi gedung kasenian.[2]

Referensi[édit | édit sumber]

  1. a b c d e f g h i Tim Redaksi.2000.Ensiklopedi Sunda Alam, Manusia dan Budaya.Jakarta:Pustaka Jaya dan Yayasan Kebudayaan Rancage (id)
  2. a b c d e f g Gedung Yayasan Pusat Kebudayaan. Kompas Jawa Barat (Surat Kabar)(id)


Nulis.jpg