Holotan

Ti Wikipédia Sunda, énsiklopédi bébas

Holotan téh ngaran hiji karajaan anu disebut dina catetan karajaan Cina jaman Dinasti Sung (420-479) kungsi ngirim utusan nu mawa surat jeung upeti (taun 435). Ieu karajaan téh perenahna di Ja-wa-da (Jawadwipa, pulo Jawa), nu rajana Sri Pa-da-do-a-la-mo. Ku Prof. Slamet Muljana, Holotan téh ditapsirkeun Aruteun, nu kiwari mangrupa ngaran walungan di wewengkon Bogor beulah kulon (Ciaruteun). Mun ieu bener ayana, ieu karajaan téh minangka nu pangkolotna di Nusantara, leuwih kolot batan Ho-ling (Keling) nu perenahna di deukeut walungan Brantas.

Kira saratus taun sanggeus utusan munggaran, nu datang ka Cina lain deui ti Holotan, tapi ti To-lo-mo (Taruma). Lamun Holotan jeung Taruma ieu datang ti wilayah nu sarua, kamungkinan gedé Holotan téh taluk ka Taruma. Anu meneran jadi raja Taruma taun 430-an téh Purnawarman jeung Wisnuwarman, Tapi, mun dikaitkeun jeung dugaan bituna hiji gunung nu salajéngna jadi gunung Krakatau, tumpurna kajayaan Aruteun téh dimimitian ku bencana alam.

Rujukan[édit | édit sumber]

  • Slamet Muljana. 1980. Dari Holotan ke Jayakarta. Yayasan Idayu, Jakarta.

Bacaeun[édit | édit sumber]

  • David Keys. 2000. Catastrophe: An Investigation into the Origins of Modern World. Ballantine Books. ISBN 978-0345408761