Istrikaan

Ti Wikipédia Sunda, énsiklopédi bébas
Istrikaan listrik

Istrikaan nyaéta kotak beusi ti handapna rata pisan bangunna méh juru tilu, di luhurna aya tutupna maké panyekelan, sok disebut ogé pangléotan atawa panglicinan.[1] Asal kecapna tina basa Walanda strijkizer nu miboga harti ngaleungitkeun kerutan baju ku maké pakakas nu dipanaskeun.[2] Gunana pikeun ngaratakeun papakéan supaya ngolontong. Istrikaan panasna biasana maké ruhak, aya ogé nu ku listrik atawa ku minyak tanah.[1]

Sajarah istrikaan saméméh maséhi[édit | édit sumber]

Istrikaan mimiti digunakeun ku bangsa Yunani taun 400 SM.[3] Nalika éta istrikaan dipaké pikeun nyieun titikelan vertikal dina pakéan-pakéan nu digunakeun dina upacara atawa hiji ritual rutin.[3] Bangsa Romawi ogé pernah ngagunakeun istrikaan nu wangunna ampir sarua jeung istrikaan modérn jaman kiwari.[3] Istrikaan nu digunakeun ku bangsa Romawi mangsa harita disebut prelum.[3] Ieu jenis istrikaan ngagunakeun téhnik pressing.[3] Istrikaan ogé geus digunakeun ku bangsa China ti abad ka 1 SM. Ieu istrikaan mangrupa pot logam nu bisa dieusian ku areng.[3]

Sajarah istrikaan dina mangsa masehi[édit | édit sumber]

Istrikaan baheula jeung patromak

Awal abad ka-17 jalma ngagunakeun istrikaan nu kasohor ku sebutan sadiron.[3] Ahir abad ka-19 nepi ka abad 20 diciptakeun istrikaan citak (cast iron).[3] Taun 1800 diciptakeun istrikaan gas jeung istrikaan listrik.[3] Sanajan istrikaan geus lila dipaké dina kahirupan manusa, tapi jalma nu munggaran nyieun istrikaan teu bisa ditangtukeun.[3] Loba jalma nu percaya yén istrikaan listrik téh dijieun ku Henry W Seely dina taun 1882.[3] Istrikaan nu dijieun ku Henry masih miboga kahéngkéran nyaéta hésé panas.[3] ku lantaran kitu, loba élmuan nu nyampurnakeun téhnologi istrikaan, di antarana waé:

  1. Crompton saparakanca di perusahaan General Electrics manggih istrikaan listrik nu aya gagangan.[3]
  2. Earl Richardson jeung Joseph Meyers nyampurnakeun istrikaan listrik nepi ka taun 1926 dijieun istrikaan uap.[3]

Referensi[édit | édit sumber]

  1. a b Danadibrata,R.A.2006.Kamus Basa Sunda.Bandung:PT Kiblat Utama Kaca 273
  2. Perawatan Setrika Listrik Archived 2011-11-04 di Wayback Machine (id) (Diakses tanggal 14 Oktober 2011)
  3. a b c d e f g h i j k l m n Sejarah Setrika Archived 2011-09-03 di Wayback Machine (Diaksés tanggal 14 Oktober 2011)