Meristem

Ti Wikipédia, énsiklopédia bébas basa Sunda
Luncat ka: pituduh, sungsi

Méristem nyaéta jaringan dina pepelakan anu sél panyusunna boga sipat embrional, hartina sanggup terus-terusan ngabeulah diri pikeun nambahan jumlah sél awak.[1] Sél méristem biasana sél ngora sarta can ngalaman diferensiasi sarta spesialisasi.[1] Ciri-ciri sel meritem nyaeta pipindingna ipis, loba ngandung protoplasma, vakuolana lueutik, inti gede, sarta plastidana can asak.[1] Wangun méristem biasana ka sagala arah, upamana saperti kubus.[1] Dina mimiti perkacambahan, kabéh sél ngalakonan aktivitas pembelahan.[2] Tapi dina pertumbuhan sarta kamekaran saterusna, pembelahan sél ngan lumangsung dina jaringan husus tumbuhan anu disebut jaringan méristem.[2] Jaringan kasebut boga sipat méristematis (embrionik), nyaéta sajumplukan sél anu aktip ngalakonan pembelahan sacara mitosis.[2] Nurutkeun tempatna, jaringan meristem dibédakeun jadi jaringan meristem apikal, meristem lateral, sarta meristem interkalar.[2]

jaringan meristem apikal
  • Meristem apikal

Meristem apikal (meristem tungtung) mangrupa meristem anu ayana dina tungtung watang sarta tungtung akar.[2] Panalungtikan ngeunaan meristem apikal geus dipigawé saprak taun 1759 ku Wolff anu nyimpulkeun yén daun sarta jaringan kakara dijieun dina titik tuwuh anu perenahna dina bagian tungtung watang.[2] Pameulahan sél-sél méristem apikal ngabalukarkeun watang sarta akar jadi manjangan.[2]

  • Meristem lateral

Meristem lateral (meristem sabeulah) mangrupa méristem anu perenahna sajajar kalayan permukaan organ tempat jaringan ieu kapanggih.[2] Méristem lateral bisa mangrupa kambium pembuluh sarta kambium gabus. Pameulahan méristem lateral ngabalukarkeun akar jadi gedé sarta watang pepelakanna jadi gedé.[2] Kamekaran anu dihasilkeun ku beulahna meristem lateral dipikawanoh minangka kamekaran sékunder sarta jaringan anu dijieun disebut jaringan sékunder.[2]

  • Meristem interkalar

Meristem interkalar (meristem anatara) mangrupa turunan méristem apikal anu aya diantara jaringan déwasa, contona dina puhu ruas watang tutuwuhan Graminae (jujukutan).[2] Kamekaran sél anu dipigawé ku meristem interkalar ngabalukarkeun mecenghulna kembang.[2]

Rujukan[édit | sunting sumber]

  1. a b c d (id) Syamsuri, Istamar. Biologi Jilid II Untuk SMA Kelas XI Semester 1. Jakarta: Erlangga. Kaca 35
  2. a b c d e f g h i j k l (id) Jati, Wijaya. 2007. Aktif Biologi. Jakarta: Ganeca exact. Kaca 23
Nulis.jpg