Rumah Sakit Umum Pusat Dr. Hasan Sadikin
Rumah Sakit Umum Pusat Dr. Hasan Sadikin Bandung atawa RSUP Dr. Hasan Sadikin Bandung nyaéta salah sahiji rumah sakit gedé anu aya di Jawa Kulon. Rumah sakit ieu aya di Jl. Pasteur No. 38, Kec. Sukajadi, Kota Bandung, Jawa Kulon 40161. Kiwari, Rumah Sakit Hasan Sadikin osok disebut RSHS anu ngabogaan 21 palayanan médis spesialistik jeung 133 palayanan médis subspesialistik. Kitu ogé dirojong ku sagala fasilitas-fasilitas médis anu lengkep.[1]
RSHS ogé kaabus salah sahiji rumah sakit kelas A anu jadi rujukan pangluhurna di Jawa Kulon, terus jadi rumah sakit rujukan nasional jeung rumah sakit atikan anu ngabogaan mutu jeung berdaya saing di taun 2019.[1]
Sajarah[édit | édit sumber]
Rumah Sakit Dr. Hasan Sadikin Bandung diwangun taun 1920 sarta diresmikeun tanggal 15 Okotober 1923 anu basa harita dingaranan “Het Algemeene Bandoengsche Ziekenhyuijs”. Taun 1927 dina tanggal 30 April, ngaranna diganti jadi “Het Gemeente Ziekenhuijsn Juliana” anu basa harita ngabogaan kapasitas 300 ranjang keur pasén. Basa jaman Jepang ngajajah Indonésia, ieu rumah sakit pernah dijadikeun Rumah Sakit Militér.[2] Saeunggeus Indonésia merdéka, rumah sakit ieu dikololakeun ku Pamaréntah Daérah Jawa Kulon anu dipikawanoh ku masarakat make ngaran “Rumah Sakit Ranca Badak”. Sabada harita, taun 1954 Rumah Sakit Ranca Badak ieu ditunjuk ku pamaréntah dijadikeun Rumah Sakit Propinsi sarta aya dina pangawasan Departemén Kaséhatan. Teu kungsi lila bada harita, taun 1956 Rumah Sakit Ranca Badak dijadikeun Rumah Sakit Umum anu ngabogaan kapasitas ranjang dua kali lipet tina asalna nyaéta 600 ranjang. Basa harita ogé dibarengan ku ngadegna Fakultas Kedoteran Universitas Padjadjaran.[2]
Dina tanggal 8 Oktober 1987, ngaran Rumah Sakit Ranca Badak diganti jadi Rumah Sakit Umum Dr. Hasan Sadikin anu kiwari osok disingkat RSHS.[2] RSHS ieu ngabogaan fungsi salaku Unit Pelaksana Tehnis (UPT) Kamentrian Kaséhatan Républik Indonésia. Taun-taun ka hareupna, RSHS ditunjuk jadi rumah sakit rujukan nasional dumasar kanu Surat Kaputusan Menteri No. HK.02.02/MENKES/390/2014 ngeunaan Pedoman Ngadegkeun Rumah Sakit Rujukan Nasional, anu ngabogaan pancén lian nyaéta nguruskeun tujuh Rumah Sakit Daérah anu aya di Jawa Kulon jeung sasabaraha Rumah Sakit anu aya di luar Propinsi Jawa Kulon. Kiwari data panganyar anu kaluar yén RSHS miboga 944 ranjang, 3000 pagawé kalawan 395 spésialis jeung sub-spésialis, tuluy ngabogaan jasa unggulan layanan jantung terpadu, layanan onkologi, layanan infeksi, bedah minimal invasif, kedokteran nuklir, jeung transplantasi ginjal.[2]
Rujukan[édit | édit sumber]
- ↑ a b "Profil Singkat | Rumah Sakit Dokter Hasan Sadikin Bandung" (dalam en-US). Diakses tanggal 2022-02-11.
- ↑ a b c d "Sejarah | Rumah Sakit Dokter Hasan Sadikin Bandung" (dalam en-US). Diakses tanggal 2022-02-11.