Samuel Morse

Ti Wikipédia, énsiklopédia bébas
Luncat ka: pituduh, paluruh
Samuel Morse
Samuel Finley Breese Morse, 1840
Gumelar Samuel Finley Breese Morse
27 April 1791
Charlestown, Massachusetts
Maot 2 April 1872 (yuswa 80)
New York City, New York
Atikan Yale College
Pagawéan Pelukis, élmuwan
Kawanoh salaku/lantaran Sandi Morse
Tanda tangan

Samuel Morse atawa Samuel Finley Breese Morse (gumelar di Massachusets, 27 April 1791, maot di New York, 2 April 1872) nyaéta seniman anu kasohor di Amérika Sarikat sakaligus salah saurang profésor seni. Anjeunna ogé élmuwan anu ngulik widang éléktromagnétik sarta junun dina nyieun télégraf éléktrik nu kahiji jeung sandi Morse dina taun 1836.[1]

Morse nyaéta anak pendéta anu kacida ngutamakeun atikan. Anjeunna dikirim keur diajar di Phillips Academy di Andover. Di ditu Morse diajar filsafat, matematika, jeung zoologi. Saterusna anjeunna nuluykeun atikanana di Yale College di mana anjeunna museurkeun paniténna dina studi listrik. Morse ogé nyieun lukisan-lukisan potrét jeung kajadian anu aya patalina jeung sajarah keur nambahan panghasilanana.[2] Salah sahiji lukisanana metot perhatian pelukis kasohor, Washington Allston. Sanggeus Morse lulus ti Yale dina taun 1810, Allston ngabingbing Morse nepi ka bisa ditarima di salah sahiji sakola seni kasohor di dunya, Royal Academy London.[1]

Dina taun 1815, Morse balik ka Amérika Sarikat. Anjeunna fokus di seni nepi ka lima belas taun sanggeusna. Anjeunna ogé ilubiung dina ngawangun Akademi Desain Nasional di New York (1825). Dina taun 1832, Anjeunna nyieun deui ékspérimen dina widang kimia jeung éléktromagnétik. Opat taun sanggeusna, Anjeunna tuluy nyieun télégraf éléktrik[3] sarta sandi Morse.[1]

Morse junun ngawangun jaringan télégraf kahiji nu panjangna 61 km ti Washington DC nepi ka Maryland. Sanggeus éta, télégraf téh ngahubungkeun tiap pelosok nu aya di Amérika Sarikat. Dina waktu kurang ti sapuluh taun, nagara-nagara di Éropa ogé ngagunakeun télégraf buatan Morse.[1]

Rujukan[édit | édit sumber]

  1. a b c d Anonim. 2008. My First Cartoonal EncylopeBee Around Great People Fun Facts and Stories Behind Book Three Inventors. Jakarta: Pustaka Lebah.
  2. "The Collection at Locust Grove". 
  3. "Morse's Original Telegraph". National Museum of American History, Smithsonian Institution.