Paguyuban Panglawungan Sastra Sunda

Ti Wikipédia, énsiklopédia bébas basa Sunda
Luncat ka: pituduh, sungsi

Paguyuban Panglawungan Sastra Sunda (disingget PPSS) nyaeta hiji paguyuban keur karumpulna singsaha wae nu mikaresep sastra Sunda. Paguyuban ieu diadegkeun tanggal 27 Maret 1966 di Bandung. Samemeh robah ngaran jadi Paguyuban Panglawungan Sastra Sunda, ngaran paguyuban ieu nyaeta Paguyuban Pangarang Sastra Sunda, nu sarua keneh singgetanana mah, PPSS.

Sajarah[édit | sunting sumber]

Paguyuban Pangarang Sastra Sunda ngadeg di antarana ku alpukah S.A. Hikmat, Ki Umbara, Rachmat M.A.S., jeung Ajip Rosidi. Taun 1975 Ki Umbara jeung Ajip Rosidi ngundurkeun diri tina kapangurusan sarta milih Yus Rusyana pikeun jadi ketua umum. Tilu taun ti harita, dina taun 1978 Yus Rusyana ogé ngundurkeun diri, Ketua Umum PPSS diganti ku Min Resmana. Sabada Min Resmana tilar dunya (1 Désémber 1988), Ketua PPSS diganti ku Rachmat M. Sas Karana. Sawatara lila PPSS teu kapireng ketakna, nya dina taun 1996 sawatara urang pendiri ngayakeun riungan pikeun ngadegkeun yayasan.

Bulan Pébruari 1996 dina acara ‘rampak buka puasa’ di Padépokan Seni, Jalan Peta No. 209 Bandung, sawatara urang pangarang badami pikeun ngahirupkeun deui PPSS. Nu hadir dina éta riungan téh, di antarana: Ajip Rosidi, Abdullah Mustappa, Rachmat M. Sas Karana, Aam Amilia, Us Tiarsa, Usép Romli, Étti R.S., Cécép Burdansyah, Édi S. Ékajati, Abdurrachman, Tédi Permadi, jeung Kuhyana Aidwidjaja (Ketua Jurusan Basa & Sastra Sunda Unpad).

Hasil tina éta riungan téh PPSS dijieun yayasan kalawan Badan Pendiri diwangun ku: Ki Umbara, Ajip Rosidi, Rachmat MAS, Yus Rusamsi, Rachmat M. Sas Karana, Yus Rusyana, Saini KM, Usép Romli, Éddy D.Iskandar, jeung Étti RS; (saméméh ditetepkeun ku notaris, Yus Rusyana ngundurkeun diri tina kaanggotaan Badan Pendiri, ari Usép Romli mah teu tulus jadi anggota Badan Pendiri ku sabab henteu milu datang ka notaris). Harita kénéh ogé ditetepkeun Badan Pembina nu diwangun ku: Achdiat Kartamihardja, Édi S.Ekajati, Abdurrachman, Aam Amilia, Us Tiarsa, Oédjang Daradjatoén, Duduh Durahman, Karno Kartadibrata, jeung Ubun Kubarsah. Dina éta riungan, Abdullah Mustappa ditetepkeun jadi ketua umum dibarengan ku Éddy D. Iskandar (wakil ketua I) jeung Usép Romli (wakil ketua II).

Dina tanggal 29 Agustus 1999 lumangsung Rapat Badan Pendiri pikeun nyieun pangurus période 1999-2000 di Komplek Yayasan Atikan Sunda, Jalan P.H.H. Mustopa Bandung. Dumasar kana hasil rapat Badan Pendiri harita, Étti R.S. ditetepkeun jadi Ketua Umum PPSS période 1999-2002 dibarengan ku Téddy Muhtadin (ketua I), jeung Cécép Burdansyah (ketua II). Réngréngan kapangurusan salengkepna ditetepkeun dina rapat umum nu lumangsung tanggal 13 Oktober 1999 di Rumah Makan Sari Sunda Jalan Soékarno-Hatta Bandung.

Rapat Badan Pendiri pikeun netepkeun pangurus période 2002-2005 lumangsung tanggal 25 Agustus 2002 di Rumah Makan Sedep Malem Jalan Burangrang No. 11 Bandung. Dina éta riungan Étti RS dipilih deui jadi Ketua PPSS periode 2002-2005. Bulan Séptémber 2002 Badan Pendiri ngariung deui di Jalan Karawitan 46 Bandung pikeun ngarobah PPSS tina wangun yayasan jadi organisasi biasa. Salian ti ngarobah wangun organisasina, dina éta riungan ogé Paguyuban Pangarang Sastra Sunda dirobah jadi Paguyuban Panglawungan Sastra Sunda. Robahna kecap pangarang kana panglawungan mibanda tujuan pikeun ngalegaan ambahan sangkan anggota ieu organisasi henteu diwangun ku pangarang wungkul, tapi ogé ku saha baé nu mikaresep sastra Sunda. Kecap panglawungan dipilih ku sabab hayang ngudag singgetan ngaran organisasi tetep PPSS luyu jeung usul ti Éddy D.Iskandar sangkan singgetanana teu robah. Dina tanggal 5 Séptémber 2005 Paguyuban Panglawungan Sastra Sunda ngayakeun rapat anggota di Jalan Karawitan 46 Bandung pikeun milih kapangurusan anyar. Pikeun katilu kalina Étti RS kapilih deui jadi Ketua PPSS période 2005-2008. Réngréngan pangurus salengkepna ditetepkeun tanggal 30 Désémber 2005 dina rapat anggota nu lumangsung di Sekretariat LBSS (YPK) Jalan Naripan No. 7 Bandung.

Tumbu kaluar[édit | sunting sumber]