Azai Nagamasa

Ti Wikipédia Sunda, énsiklopédi bébas
Loncat ke navigasi Loncat ke pencarian
Asai Nagamasa

Azai Nagamasa (浅井 長政, 1545-1573) nyaéta daimyo salila perang sipil Jepang jaman Sengoku. Manéhna téh adi beuteung ti nu ngahijikeun Jepang, Oda Nobunaga anu antukna jadi musuh alatan panghianatan pasakutuan maranéhanana.

Awal kahirupan[édit | édit sumber]

Nagamasa babar di Kastil Odani milik klan Azai. Bapana, Azai Hisamasa, nyaéta pamingpin nu lemah nu ahirna bisa diéléhkeun ku klan Rokkaku dina kapamingpinan Rokkaku Yoshikata. Dina awal taun 1559, manéhna kawin jeung awéwé ti klan Rokkaku pikeun nguatkeun pasakutuan antara dua marga atawa klan. Tapi teu lila manéhna ngabolaykeun kawinan ieu.

Di tengah taun 1560, tentara Rokkaku nyerang Omi, wilayah Azai nepi ka ngabalukarkeun perang. Dina perang ieu, Nagamasa némbongkeun pangabisana salaku pamingpin nu kuat, sanajan umur-na dina waktu harita masih ngora pisan. Taun satuluyna manéhna junun nepi ka bisa ngawasa Kastil Futo nu saméméhna dikawasaan ku Rokkaku. Jeung bapana, manéhna ngéléhkeun klan Rokkaku dina Perang Norada. Sanggeus meunang dina peperanngan ieu, nu ngilu ka klan Azai nungtut supaya Hisamasa mundur jeung masrahkeun jabatan ka putrana, Nagamasa, anu dianggap leuwih sanggup. Hisamasa ahirna nurut, manéhna masrahkeun jabatanna ka Nagamasa sarta pangsiun, méakkeun sesa hirupna di kastil Odani. Ku kituna Nagamasa ayeuna geus jadi daimyo klan Azai nu katilu.

Jadi pangawasa Omi[édit | édit sumber]

Sanggeus jadi pamingpin, lengkah kahiji pikeun nyerang Mino nu dikawasa klan Saito. Klan Rokkaku nyokot kasempetan di satengahing Nagamasa ngalawan Saito ku cara ngepung Kastil Sawayama di Omi. Tapi, Nagamasa bisa nyalametkeun kastil éta ku ngirim bantuan nu dipingpin ku Isono Kazumasa. Dina waktu éta, Oda Nobunaga, panguasa Owari ogé keur ngalakukeun ekspansi ka Mino. Pikeun nganggeuskeun peperangan nu katutuluyan, klan Oda jeung Azai sapuk pikeun ngadegkeun pasakutuan, Nobunaga ngawinkeun adina, Oichi ka Nagamasa taun 1564. Maranéhanana miboga tilu budak lalaki sarta tilu budak awéwé.

Taun 1570, Nobunaga nu kakawasaanna beuki kuat satru jeung Tokugawa Ieyasu ti Mikawa pikeun nyerang klan Asakura ti Echizen. Hal ieu nyieun dilema pikeun Nagamasa, sanajan Nobunaga nyaéta adi beuteungna, tapi Asakura ogé satru heubeul sarta sobat deukeut jeung klan Azai. Sanggeus badami jeung anggotana, manéhna nangtukeun pilihan pikeun mantuan Asakura jeung nyerang Oda. Nagamasa nyerang garis tukang tentara Oda di Perang Anegawa. Perang nu kacida gedena antara Azai-Asakura jeung Oda-Tokugawa. Pasukan gabungan Azai-Asakura ahirna éléh sarta kaleungitan jenderal-jendral pangalusna kayaning Endo Naotsune jeung Makara Naotaka. Tapi sawatara bulan saterusna maranéhanana junun ngabales dengdem elehna dina perang di Otsu nu nyokot nyawa Oda Nobuharu, adina Nobunaga. Saprak harita Nobunaga kacida geuleuhna ka Nagamasa jeung ngucap sumpah pikeun balas dengdem ku sabab panghianatan-na.

Nagamasa saterusna ngagabung dina pasakutuan nu anti-Oda nu diwangun tina klan-klan nu kaancam ku Nobunaga salaku Asakura, Rokkaku, biksu-biksu gerilyawan ti Gunung Hiei, jeung Shogun Ashikaga Yoshiaki. ku sabab pasakutuan ieu, dua kali serangan Nobunaga ka kastill Odani, nyaéta di taun 1571 jeung 1572 bisa digagalkeun. Pertahanan kastil dilengkepan pakarang seuneu jeung panangtayungan ti Asakura, Nobunaga teu wani gagabah, leuwih ti éta, manéhna ogé kudu nyanghareupan anceman lawan nu séjénna.

Éléh sacara tragis[édit | édit sumber]

Di taun 1573, Shingen Takeda, salah sahiji musuh nu kuat Nobunaga geus tilar dunya ku kituna perhatian Nobunaga ayeuna fokus ka dendam nu baheula ka Nagamasa. Dina taun éta Nobunaga mimiti nyerang ka Omi ku cara ngepung kastil Sawayama nu dijaga ku Isono Kazumasa. Sanggeus dalapan bulan pamungkas, Isono ahirna nyerah. Nagamasa kacida murkana sarta ngahukum pati indung Isono anu cicing di kastil Odani salaku sandera. Oda terus maju nyerang Odani sanggeus saméméhna nyergap jeung ngancurkeun kakuatan Asakura saméméh maranéhanana nepi ka Odani. Kastil Odani ayeuna dikepung, bapana, Hisamasa, ngalakukeun seppuku pikeun nempo karuksakan nu aya. Sadar yén geus euweuh harepan, Nagamasa maréntahkeun pamajikanana, Oichi, sarta tilu anak awéwéna pikeun mulang ka klan Oda, sadengkeun manéhna sorangan jeung budak lalakina, Manjumaru ngalakukeun seppuku di kastil. Numutkeun salah sahiji versi carita, pikeun nyumponan dendamna, Nobunaga maréntahkeun tangkorak Nagamasa jeung Asakura Yoshikage dijadikeun gayung nu dipaké diacara Kyoto.

Tutumbu kaluar[édit | édit sumber]

Samurai Archives

Nulis.jpg