Bubur lolos
Bubur lolos mangrupa bubur nu dijieun tina bahan utamana tipung béas, dibungkusna ku cara digulungkeun jero daun cau beunang ngulasan ku minyak keletik nepi ka lamokot.[1] Bubur lolos sok dipaké hajat nu keur ngandung atawa disebutna tingkeban, ari maksudna nyaéta supaya lancar dina waktuna babar.[1][2]
Pedaran
[édit | édit sumber]Saenyana ieu wangun jeung warnana mirip pisan jeung dodol Batawi.[3] Ari rasana pohara legit jeung gurih.[3] Ngan nu mantak jadi hémengna mah, ongkoh mah bubur tapina diwadahanna ku daun cau jaba teu cair deuih, sahingga ieu mah bisa teu kaasup kana kategori bubur.[3] Ari bubur lolos bahan dasarna tina tipung béas, tipung ketan, sarta aci hui nu digalokeun jeung gula beureum ogé cipati sahingga ngabentuk adonan nu geunyal.[3] Cipati nu dipakéna nyaéta cipati kintel, mun upamana diolahkeun téh engkéna ngaluarkeun minyak nu loba sahingga teu cepel pas dibungkusanna. Ieu bubur dibungkus ku daun cau, ngan lebah sisi nu hijina teu ditutup.[3] Saméméh dibungkus ku daun cau, adonan ieu bubur dicipatian, cipatina nu kintel pisan.[3] Nu mantak teu anéh mun ieu bubur téh rasana pohara legit jeung gurihna.[3] Ari jinisna, aya bubur lolos bodas aya ogé bubur lolos beureum.[1]
Filosofi
[édit | édit sumber]Bubur lolos sok disuguhkeun dina acara tingkeban, umumna mah 7 bulanan anu keur ngandung, ngan sok aya ogé dina mangsa 4 bulan atawa 9 bulan umur kakandungan.[2] Ieu bubur dingaranan lolos mibanda filosofi yén di mana brol babar téh baris lungsung-langsar, lolos tina kasusah.[2] Kitu deui dina wangun ieu bubur, henteu diwadahan ku mangkok atawa piring, anging diwadahan ku daun cau kalawan diminyak-keletikan, maksudna supaya prosés babar téh lancar sakumah lésangna bubur nu antel kana daun nu diminyakan téa.[2]
Rujukan
[édit | édit sumber]- ↑ a b c Danadibrata, R.A. (2009). Kamus Sunda R.A. Danadibrata. Indonesia: Kiblat Buku Utama. p. 413. ISBN 9793631937.
- ↑ a b c d Rahayu Tamsyah, Budi (2009). Kamus Sunda-Indonesia. Indonesia: Pustaka Setia. ISBN 9797306526.
- ↑ a b c d e f g "Bubur Lolos, Mitos Bikin Lahiran Lancar". Detik.com. Diakses tanggal 28/09/2017.
|
Artikel ngeunaan dahareun jeung inuman ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |