Kornét

Ti Wikipédia, énsiklopédia bébas
Loncat ke navigasi Loncat ke pencarian
Kornét nu karék dipesék

Kornét nyaéta bahan olaheun tina daging sapi anu diawétkeun.[1] Jinis kadaharan ieu geus kasohor di masarakat, sanajan teu alabatan kasohorna siga baso.[1] Kiwari kornét geus jadi salah sahiji jinis produk olaheun tina daging sapi anu loba dipaké dina papasakan Indonésia. Kornét daging sapi diolah ku cara diawétkeun dina ci uyah (brine), nyaéta cai anu dicampuran ku uyah. Satuluyna diasakan ku cara simmering, nyaéta dikulub ku seuneu leutik pikeun nyegah ancurna si daging sapi téa.[2]

Tujuan Dijeunna Kornét[édit | édit sumber]

Tujuan dijieunna kornét daging sapi nyaéta supaya tetep bisa ngonsumsi produk daging sapi anu warna euceuy, awét jeung prahtis.[2] Ku diprosés jadi kornét, perkara nyimpen daging sapi seger teu pikahariwangeun (sieun buruk). Supaya awét, daging sapi seger émang kudu diteundeun dina hawa nu nyelecep atawa hawa beku, alatanna jadi teu prahtis mun rék diolahkeun.[2] Sedengkeun daging sapi seger anu geus diprosés jadi kornét saterusna dikaléngan, bisa diteundeun dina hawa rohangan kira-kira dua taun.[2]

Sajarah Dijeunna Kornét[édit | édit sumber]

Ngaran kornét asalna tina basa Inggris “corned”, tina kecap “corn” nu maksudna rates, nyaéta alatan tina partikel uyah kasar anu dipaké pikeun ngolah éta kornét.[2] Cara ngolah daging sapi sangkan jadi kornét, parkiraan mimiti medalna dina abad ka-12 di Irlandia.[2] Data ieu dumasar kana padalisan puisi Aislinge Meic Con Glinne atawa The Vision of MacConglinne, anu nyebut daging olahan ngeunah sajinis kornét.[2]

Di Irlandia, dina abad ka-12, kagiatan meuncit sapi dilakonan nalika sapi peres geus teu ngahasilkeun susu deui, atawa mun sapi daging teu bisa deui digawé.[2] Jadi kornét anu asalna tina daging sapi nyaéta susuguh nu jarang jeung kacida mibanda harga.[2] Dina taun 1740 kajadian musibah mangrupa robahna iklim anu ekstrim anu nimpah wewengkon Irlandia, nu pas harita mah dijajah Inggris.[2] Ampir sakabéh lahan tani gé gararing jeung pangeusi Irlandia kaancam kalaparan, kaasup piaraan samodél sapi nu dipiboga ku maranéhanana.[2] Pipiaraan sapi daging (sapi potongeun ) jeung sapi peres anu dipiboga ku warga Irlandia saterusna disalametkeun ka Inggris.[2]

Namung ku sabab kabutuhan kana daging sapi di Inggris téh terus baé ngaronjat, pamaréntah Inggris harita lainna ngabantuan nyalametkeun warga Irlandia tina kalaparan ieuh, éta urang Inggris téh kalakah maksa warga Irlandia pikeun ngarobah lahan tani jadi pangangonan sapi daging (sapi potongeun), anu hasilna diolah jadi kornét pikeun di eskpor ka Inggris.[2]

Kornét nu dijualan jeung didahar ku urang deungeun

Pangeusi Irlandia anu lain tukang ngingu sapi ngan ukur dibéré lahan kawates pikeun melak kentang pikeun kaperluan maranéhanana urang Inggris téa.[2] Kaayaan ieu sacara teu langsung ngarobah pola dahar pangeusi Irlandia, jeung teu ngasupkeun deui daging sapi kana menu dahar maranéhanana.[2] Kaayaan ieu mingkinan joré wé, alatanna dina abad ka-18 aya goromolan pangungsi Irlandia ka Amérika Sarikat.[2] Di wewengkon anyar ieu, warga Irlandia bisa deui ngadahar daging sapi anu saterusna diolah jadi kornét.[2] Warga Irlandia emang leuwih akrab jeung kornét, dibandingkeun jeung olahan daging sapi di Amérika nyaéta bacon.[2]

Kornét nu Ayeuna[édit | édit sumber]

Kiwari, najan asalna ti Irlandia, kornét geus teu dianggep deui minangka susuguh nasional Irlandia.[2] Ogé ayeuna mah nu ngadahar kornét téh sok dikaitkeun kana budaya Irlandia-Amérika saperti raraméan Saint Patrick’s Day, ping 17 Maret, nyaéta salah sahiji poé peré kaageman (katolik) di Irlandia.[2] Di Amérika Sarikat jeung Kanada, kornét biasana dipasarkeun di delicatessens (warung kadaharan) dina 2 wangun nyaéta: sempalan daging sapi (biasana jinis sandung lamur, kadang-kadang mah jinis round atawa 'silverside) anu diawétkeun, atawa daging sapi anu dikeueum dina ci uyah jeung dikekeb dina kaléng (satengah asak).[2] Kornét ieu béda jeung kornét anu diimpor ti Amérika Kidul, nu mana daging sapina téh dicacag heula saméméhna.[2]

Rujukan[édit | édit sumber]

  1. a b Ir. Hj. Komariah, M.Si, dkk. 2013. Aneka Olah Daging Sapi. Jakarta: Agro Media Pustaka.
  2. a b c d e f g h i j k l m n o p q r s t u v http://www.duniasapi.com. 2011. Kornét Pada Awalnya Dibuat Dari Daging Sapi Perah Yang Tidak Lagi Menghasilkan Susu. Indonesia: Dunia Sapi.