Maudy Koesnaedi
Maudy Koésnaédi téh nyaéta salah sahiji modél, aktris, jeung préséntér TV nu gumelar 8 April 1975. Ngaran lengkepna mah Maudy Kusnaria Koésnaédi, seuweuna Koesnaedi Bagdja jeung Sondari Soemijati. [1]
Ngaranna mimiti sohor sabada merankeun tokoh Zaenab, wanoja pikayungyuneun dina sinétron Si Doel Anak Sekolahan bareng jeung Rano Karno. Inyana mitembeyan nété karirna dina dunya modelling nepi ka diistrénan salaku None Jakarta 1993. Dina dunya modelling, Maudy Koésnaédi kungsi jadi modél vidéo klip dina lagu Andai Dia Tahu nu dilagukeun ku grup band Kahitna (taun 1996) jeung Kau yang Terindah yasana Java Jive (taun 1997). Salian ti jadi modél, Maudi Koésnaédi kungsi nyutradaraan sandiwara musikal Batawi nu judulna Cinta Dasimah taun 2009.
Bakatna dina dunya seni peran tuluy mékar ngaliwatan pilem-pilem nu dipaénkeun ku inyana. Maudy Koésnaédi kungsi merankeun tokoh Inggit Garnasihdina pilem Soekarno(taun 2013),salah sahiji garwaSoekarnonu ahirna pepegatan. Maudy gé merankeun tokoh nu sarua (Zaenab) dina pilemSi Doel Anak Sekolahan nu di-remake kalawan judul Si Doel The Movie (taun 2018) jeung Akhir Kisah Cinta Si Doel (taun 2020). Di saluareun éta, Maudy Koésnaédi kungsi merankeun rupa-rupa tokoh dina sawatara pilem lianna.
Préstasina dina dunya seni peran geus ngalantarankeun Maudy nyangking sawatara pangajén, diantarana nyaéta Aktris Terbaik - Piala Vidia Festival Film Indonesia 2011, 50 Wanita Tercantik di Indonesia ( taun 2012), Aktris Pendukung Wanita Terbaik - Indonesian Movie Awards (taun 2014), Presenter Non Berita Terbaik - Anugerah Komisi Penyiaran Indonesia (taun 2016), 10 Wanoja Inspiratif (taun 2016)[2], jeung salian ti éta. [1][tumbu nonaktif]
Taun 2001, Maudy Koésnaédi jatukrami ka Frederik Johannes Meijer atawa nu nelah disebut Erik Meijer, jajaka turunan Walanda tur diparengkeun boga budak nu dingaranan Eddy Maliq Meijer taun 2007.
- ↑ VIVA, PT VIVA MEDIA BARU-. "Profil Maudy Koesnaedi - VIVA". www.viva.co.id (dalam Indonesian). Diakses tanggal 2021-09-13.
- ↑ Fimela.com. "Maudy Koesnaedi Dapat Penghargaan 10 Wanita Inspiratif". fimela.com (dalam Indonesian). Diakses tanggal 2021-09-14.