RNA

Ti Wikipédia Sunda, énsiklopédi bébas
Struktur RNA

RNA atawa Ribonucleic Acid (basa Indonésia: Asam Ribonukléat) nyaéta molekul-molekul gula D-ribosa, gugus fosfat, tapi basa nitrogéna kasusun ku basa purin (ngawengku adénin (A) jeung guanin (G)) sarta pirimidin (ngawengku urasil (U) jeung sitosin (C)).[1]

Struktur jeung Tipe RNA[édit | édit sumber]

Substansi dasar nukléus kasusun ku nukléoprotéin anu dijieun ku protéin jeung asam nukléat. Dina kasus ieu, asam nukléat ngawengku dua rupa anu aya patalina jeung héréditas nyaéta DNA (Déoxyribonucleic Acid) jeung RNA. Fungsi DNA nyaéta minangka hétérokatalitik nyaéta ngasintesis molékul séjén siga RNA. RNA mangrupa hasil transkripsi DNA. Sél prokariotik jeung eukariotik ngawengku asam inti anu disebut RNA. Beda jeung DNA anu boga ranté ganda, RNA ngan ngabogaan ranté tunggal. Unggal pita RNA mangrupa polinukléotida ti RNA.[2]

Aya bébédana ogé jeung DNA anu aya dina nukléus, RNA lolobana aya dina sitoplasma utamana ribosom sanajan aya ogé sababaraha di nukléus. Dina sitoplasma, lobana RNA bisa robah-robah. Kajadian ieu dipangaruhan ku aktivitas sintésis protéin. Nalika hiji protéin disintésis, eusi RNA dina sél bakal ngaronjat, kitu ogé sabalikna. RNA ngabogaan komponén gula anu wangunna D-ribosa (péntosa). RNA ogé ngabogaan basa nitrogén anu sarupa siga DNA, ngan basa timin jeung pirimidin diganti ku urasil.[2]

RNA mibanda tilu tipe anu baris didadarkeun sakumaha di handap ieu:

  • rRNA (ribosom RNA) nyaéta RNA anu aya di sitoplasma utamana di ribosom jeung boga pungsi ngatur dina prosés sintésis protéin. rRna kuantitasna bisa nepi ka 80% tina jumlah sél RNA. Molekul rRNA boga wangun pita tunggal anu teu boga cabang sarta boga sipat fléksibel.[1]
  • mRNA (messenger RNA) nyaéta RNA anu pangbadagna sarta pangpanjangna anu diwangun dina jero nukléus. mRNA boga pungsi mawa kode génétik ti DNA ka ribosom. mRNA sok sakapeung disebut ogé kodon sabab runtuyan basa N panyusuna mangrupa kode génétik pikeun sintésis protéin. mRNA dicitak ku DNA dina inti anu saterusna dikirim ka ribosom. Sintésis mRNA dicitak ku DNA nalika diperlukeun jeung teu tutuluyan dicitak tapi gumantung kana jenis protéin anu bakal disintésis dina sitoplasma.[1]
  • tRNA (transfer RNA) nyaéta RNA anu aya di sitoplasma sarta bisa dipikawanoh ku ranté anu pondok. Pancén tRNA nyaéta narjamahkeun kodon ti mRNA. tRNA boga pungsi pikeun ngangkut asam amino ka tempat sintésis protéin, nyaéta ribosom ngaliwatan tarjamahan kode-kode anu dibawa mRNA.[1]

DNA jeung RNA mibanda komponén anu hampir sarua tapi duanana mibanda struktur, pungsi jeung sababaraha matéri panyusun anu beda.[1]

Rujukan[édit | édit sumber]

  1. a b c d e Sembiring, Langkah. 2009. Biologi untuk SMA Kelas XII. Jakarta: Intan Pariwara
  2. a b Reece., Urry., dkk. 2005. Biology Campbell. US: Pearson Highered