Anggun C. Sasmi

Édit tutumbu
Ti Wikipédia Sunda, énsiklopédi bébas
Anggun (2011).

Anggun Cipta Sasmi atawa nu leuwih kasohor ku sebutan Anggun C. Sasmi nyaéta salah sahiji musisi Indonesia nu kasohor ka sakuliah dunya.[1] Lahir di Jakarta tanggal 29 April 1972.[1] Lahir ti pasangan Darto Singo, salah saurang seniman sarta Dian Herdina, wanoja turunan Karaton Yogyakarta.[1]
Ti leuleutik kénéh, Anggun geus boga bakat dina widang musik.[1] Nalika umurna 9 taun, Anggun geus bisa ngaluarkeun laguna sorangan.[1] Dina umurna nu ka-14, Anggun mimiti rékaman albeum rock munggaranana.[1] Albeum nu judulna Dunia Aku yang Punya (1986) diorbitkeun ku musisi Ian Antono sarta didistribusikeun ku Blackboard Records.[1] Tuluy, Anggun rékaman albeum nu kaduana Tua-tua Keladi (1990), dituluykeun kana albeum Anak Putih Abu-abu (1991), Gaya Remaja (1992), Noc Turno (1992), Anggun Cipta Sasmi…Lah (1993) sarta nu pamungkas nyaéta Yang Hilang (1994).[1]
Anggun nu boga kahayang bisa ngalanglang ka sakuliah dunya ahirna hijrah ka London, Inggris.[1] Tapi sawatara waktu, Anggun mekarkeun bakatna dina widang musik di Paris, Prancis.[1] Di Paris, Anggun panggih jeung Erick Benzi, salah sahiji produser nu kasohor di Paris.[2] ti dinya, Anggun ngagabung jeung label rékaman Sony Music Prancis.[2] Albeum munggaranan dina taun 1997 nyaéta Au Nom De La La Lune dina basa Prancis atawa Snow on Sahara dina basa Inggris.[2] Ieu albeum kajual di sawatara nagara Eropa kayaning Belgia, Italia, Switzerland, Prancis sarta di sawatara nagara di Asia.[2] Salian ti éta, ieu albeum ogé dilélér Double Gold di Prancis, Double Platinum di Italia, Gold di Singapura, Gold di Switzerland, Platinum di Malaysia, jeung Triple Platinum di Indonésia.[2] Sataun ti dinya, Anggun ngarilis albeum Désirs Contraires atawa Chrysalis (versi basa Inggris di pasar internasional).[2] Albeum ieu ogé dilélér Gold di Italia, Platinum di Prancis, Double Platinum di Indonésia, sarta Multi Platinum di sawatara nagara saluareun Asia.[2] Tuluy albeum Open Hearts (2002), Luminesence (2005), jeung Luminescene Speial Edition (2006).[1] Ahir bulan Méi 2011, Anggun ngaluarkeun albeum nu judulna Echoes nu diproduseran ku Anggun sorangan.[1] Ieu albeum dirilis dina dua basa nyaéta Indonésia jeung Inggris.[1] Salian ti karirna di dunya hiburan, Anggun ogé aktip di sawatara kagiatan sosial.[1] salah sahijina di FAO jadi Goodwill Ambassador keur PBB.[1] Anggun ogé kasinugerahan Diamond Award sarta panglélér husus ti menteri kabudayaan Prancis dina The International Exhibition of the Music Industry di Miden.[2]

Rujukan[édit | édit sumber]

  1. ↑ a b c d e f g h i j k l m n o Anggun C Sasmi (id) (Diakses tanggal 1 Desember 2011)
  2. ↑ a b c d e f g h Biografi Anggun C Sasmi (id) (Diakses tanggal 1 Desember 2011)


Replace this image male.svg Artikel ngeunaan biografi inohong Indonésia ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan.
Dicomot ti "https://su.wikipedia.org/w/index.php?title=Anggun_C._Sasmi&oldid=553191"