Gliserol

Gliserol nu ogé katelah gliserin nyaéta sanyawa kimia cair tanpa warna, tanpa bau, jeung kentel nu sok dipaké dina industri farmasi. Ieu sanyawa téh golongan alkohol gula, ku kituna karasa amis kalawan toksisitas asor. Gliserol ngandung tilu gugus hidroksil hidrofilik nu ngajadikeun ieu cairan leyur dina cai sarta boga watek higroskopik. Tegangan permukaanana 64,00 mN/m dina suhu 20 °C , sedengkeun koéfisién suhuna -0.0598 mN/(m K).

Sintésis jeung produksi

Gliserol (modél 3D), némbongkeun atom-atomna jeung pasangan éléktron bébas nu dibeungkeut ku atom oksigén (kayas).

Nepi ka sababaraha waktu ka tukang, gliserol sintétis dijieun dina skala industri tina épiklorohidrin. ku sabab gliserol téh minangka tulang tonggong trigliserida, ieu sanyawaan bisa dihasilkeun tina saponifikasi atawa trans-ésterifikasi, misalna baé di industri sabun jeung biodisel.

Di industri biodisel, gliserol téh 10% produk lian tina produksina (tina trans-ésterifikasi minyak nabati). Hal ieu ngabalukarkeun ceuyahna gliserol atah di pasar, antukna prosés épiklorohidrin jadi henteu ékonomis. Kiwari, produksi gliserol di AS nepi ka kira 350.000 ton per taun, sedengkeun di Éropa 600.000 ton per taun. Ka hareup, produksina bakal leuwih loba ku dilarapkeunana kawajiban ngaganti 5,75% suluh minyak bumi ku biosuluh (biofuel) di Éropa taun 2010^[1].

Larapan

Dina widang pangan, gliserol dipaké minangka huméktan, pelarut jeung pangamis, sarta bisa ogé minangka pangawét. Lian ti éta, gliserol dipaké pikeun ngentelkeun inuman jeung ngawétkeun sababaraha jenis dangdaunnan (campur cai). Gliserol dipaké ogé pikeun gaganti gula (saséndok entéh gliserol ngandung 27 kalori, amisna 60% amis sukrosa). Najan kandungan énérgina ampir sarua jeung gula méja, gliserol teu nambahan kadar gula getih, sarta teu ngarangsang karuksakan huntu. Minangka aditif, gliserol disandian nomer E E422.

Minangka bahan baku

Gliserol téh bahan baku produksi poliol keur nyieun busa fléksibel jeung busa heuras poliurétan. Gliserol dipaké pikeun ngahasilkeun nitrogliserin, bahan penting mesiu tanpa haseup jeung bahan bitu lianna. ku sabab ayana minangka hasil séjén industri sabun, produksi gliserin keur kaperluan perang biasana teu nyukupan. Ku kituna, produksi gliserin sintétik jadi prioritas pertahanan nagara dina mangsa nyanghareupan Perang Dunya II.

Gliserol ogé dipaké dina industri mono- jeung di-gliserida pikeun ngahasilkeun émulsifier, kitu ogé éster poligliserol pikeun ngahasilkeun shortening jeung margarin.

Mangpaat séjén

Kiwari hangkeut panalungtikan pikeun ngahasilkeun molekul nu leuwih boga ajén tina bahan dasar gliserol kasar (biasana ngandung 20% cai jeung résidu katalis ésterifikasi) ti industri biodisel, daripada ukur dipiceun kana insinerator. salah sahiji programna nyaéta The Glycerol Challenge Archived 2008-05-23 di Wayback Machine. Sababaraha mangpaat anu kasawang di antarana

Unit produksi gas hidrogén ^[2]
Gliserin asetat (pikeun aditif suluh)^[3]
Aditif kompos
Produksi asam sitrat

Baca ogé

Rujukan

Glycerol. Wikipédia basa Inggris. Disalin 7 Oktober 2008.

↑ The Glycerol Challenge Archived 2008-05-23 di Wayback Machine
↑ A. T. Marshall and R. G. Haverkamp (2008). "Production of Hydrogen by the Electrochemical Reforming of Glycerol-Water solutions in a PEM electrolysis cell". International Journal of Hydrogen Energy 33 (17): 4649-4654. doi:10.1016/j.ijhydene.2008.05.029.
↑ J. A. Melero, R. vanGrieken, G. Morales and M. Paniagua (2007). "Acidic Mesoporous Silica for the Acetylation of Glycerol: Synthesis of Bioadditives to Petrol Fuel". Energy Fuels 21 (3): 1782–1791. doi:10.1021/ef060647q.

U.S. Health.gov dietary guidelines Archived 2007-10-10 di Wayback Machine

Tumbu kaluar

Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan.

[1] The Glycerol Challenge Archived 2008-05-23 di Wayback Machine

[2] A. T. Marshall and R. G. Haverkamp (2008). "Production of Hydrogen by the Electrochemical Reforming of Glycerol-Water solutions in a PEM electrolysis cell". International Journal of Hydrogen Energy 33 (17): 4649-4654. doi:10.1016/j.ijhydene.2008.05.029.

[3] J. A. Melero, R. vanGrieken, G. Morales and M. Paniagua (2007). "Acidic Mesoporous Silica for the Acetylation of Glycerol: Synthesis of Bioadditives to Petrol Fuel". Energy Fuels 21 (3): 1782–1791. doi:10.1021/ef060647q.

[1]

[2]

[3]