Jostein Gaarder

Ti Wikipédia, énsiklopédia bébas
Luncat ka: pituduh, sungsi
Jostein Gaarder

Jostein Gaarder, sastrawan asal Norwégia, lahir di Oslo taun 1952.[1] Ngamimitian karir sastrana taun 1986; medalkeun kumpulan carita pondok disusul dua novel pikeun bacaeun rumaja.[1] Dina taun 1990 meunang panghargaan ti Norwegian Literary Critics jeung hadiah sastra ti Menteri Pendidikan dan Kebudayaan pikeun bukuna The Solitaire Mystery. [1] Gaarder ogé ngajarkeun filsafat pikeun barudak sakola tingkat menengah salila kurang leuwih 11 taun di Norwégia. [1] Ayeuna mah inyana wungkul ngalakonan kahirupan salaku panulis. [1] Gaarder nganjrek di Oslo jeung kulawargana. [1]

Salasahiji karya Gaarder, Dunya Sofi, nyaéta novel ngeunaan sajarah filsafat ti mimiti awal kamekaranana di Yunani nepi ka abad kadua puluh. [1] Ieu buku munggaran medal taun 1991 dina basa Norwégia kalawan judul Sofie’s Verden, jeung nepi ka kiwari geus ditarjamahkeun kana leuwih ti 30 basa di dunya. [1] Di Jepang, ieu novel dipedalkeun ku NHK Japan Broadcast Publishing dina Juni katompérnakeun taun 1995 tur geus laku 1,6 juta éksemplar ngan ukur dina waktu genep bulan. [1] Di Jérman dipedalkeun ku Hanser Verlag dina Agustus 1993, nepi ka kiwari geus kajual leuwih ti 1,5 juta éksemplar. [1] Édisi Perancis dipedalkeun ku Du Seuil dina bulan Maret 1995 tur laku leuwih ti 800 rébu éksemplar. [1] Rata-rata di nagara-nagara anu geus narjamahkeun ieu novel, laku tepi ka 200 rébuan éksemplar. [1] Dina taun 1995 ieu novel jadi bestseller di dunya. [1]

Jostein Gaarder kungsi datang ka Indonésia tanggal 10-13 Oktober 2011, tur méré ceramah di Universitas Indonésia.[2] Eusi ceramahna di antarana ngeunaan parobahan iklim jeung pangwangunan anu tuluy-tumuluy.[2] Acarana lumangsung di auditorium Universitas Indonésia, kalawan diiluan ku leuwih ti 200 pamilon.[2] Datangna ka Indonésia téh diatur ku Kedutaan Besar Norwégia rampak gawé jeung Universitas Indonésia.[2]

Jostein Gaarder katémbong soson-soson dina miara iklim jeung lingkungan. [2] Inyana geus ngadegkeun hiji yayasan kamanusaan, Hadiah Sofi. [2] Ieu hadiah mangrupa panghargaan internasional pikeun lingkungan hirup jeung pangwangunan anu tuluy-tumuluy. [2] Unggal taunna ieu yayasan ngaluarkeun waragad 100 rébu dolar Amérika. [2]

Référénsi[édit | sunting sumber]

  1. a b c d e f g h i j k l m Gaarder, Jostein. 1997. Dunia Sophie (Tarjamah tina Sophie’s World ku Rahmani Astuti). Bandung: Mizan. ISBN 979-433-103-1
  2. a b c d e f g h http://www.norway.or.id/Norway_in_Indonesia/culture/Jostein-Gaarder-in-Indonesia-10th--13th-October-2011/, dikunjal tanggal 16 Nopémber 2011


Nulis.jpg