Situ Dal
| Situ Dal | |
|---|---|
 Pamandangan Situ Dal jeung Char Chinar | |
| Lokasi | Srinagar, Jammu jeung Kashmir, India |
| Koordinat | 34°07′N 74°52′E / 34.117°N 74.867°EKoordinat: 34°07′N 74°52′E / 34.117°N 74.867°E |
| Tipeu situ | Situ monomik |
| Kokocoran asup utama | Kanal asup Telbal Nallah ti Situ Marsar −291.9 juta méter kubik |
| Kokocoran kaluar utaman | Kaatur, dua kanal (Gerbang Dal jeung Nalla Amir) – 275.6 juta méter kubik |
| Wewengkon panampungan | 316 square kilometres (122 sq mi) |
| Nagara basin | India |
| Panjang maks | 7.44 km (4.62 mi) |
| Lébar maks | 3.5 km (2.2 mi) |
| Lega pabeungeutan | 18–22 square kilometres (6.9–8.5 sq mi) |
| Jero rata-rata | 1.42 metres (4.7 ft) |
| Jero maks | 6 m (20 ft) |
| Water volume | 983 million cubic metres (34.7×109 cu ft) |
| Wanci nyimpen | 22,16 poé |
| Panjang basisir1 | 15.5 km (9.6 mi) |
| Luhur pabeungeutan | 1,583 m (5,194 ft) |
| Beku | Salila usum tiris |
| Pulo | Dua (Sona Lank jeung Rupa Lank (atawa Char Chinar)) |
| Tempat | Hazratbal, Srinagar |
| 1 Shore length is not a well-defined measure. | |
Situ Dal nyaéta hiji situ anu aya di Srinagar, nagara bagian Jammu jeung Kashmir, India. Situ ieu kawentar ku kaéndahanana, malahan mah ieu situ dilandi "sawarga di bumi India" jeung "intan makuta Srinagar". Situ ieu perenahna kira-kira 25 kilométer di Kota Srinagar, puseur dayeuh nagara bagian Jammu jeung Kashmir.[1] Situ Dal mangrupa situ kadua panggedéna di nagara bagian éta.[2]
Situ Dal sok dijadikeun tempat syuting pilem Bollywood, babaraha filmanu kungsi syuting di dieu nyaéta Jab Tak Hai Jaan,[3][4] Mission Kashmir,[5][4] Rockstar,[6] jeung Notebook.[4]
Sajarah
[édit | édit sumber]Dina basa Sangsekerta, Situ Dal disebut Mahasarit (महासरित्). Dumasar sajarah kuna Sangsekerta, aya hiji lembur anu ngaranna Isabar anu dicicingan ku Batari Durga.[7]
Nalika India diparéntah ku Kakaisaran Mughal, Situ Dal dijadikeun minangka tempat pikeun pakanci di usum panas. Kebon-kebon taraté dipelakan di pasisian situ, sarta taman-taman dijarieun, di antarana Shalimar Bagh jeung Nishar Bagh anu dijieun nalika jaman Kaisar Jahangir.[8] Ti saprak Kaisar Aurangzeb tilar dunya di taun 1707, anu nyababkeun disintegrasi Kakaisaran Mughal, urang Pashtun di daérah sabudeureun situ jeung kota ngalobaan, sarta Kakaisaran Durrani Afghanistan maréntah Srinagar salila babaraha dékadeu. Tuluy di taun 1814, landeuh Kashmir, kaasup Srinagar, dianéksasi ku Raja Ranjit Singh ti Dogra Raj, saenggeus kitu, urang Sikh ngalobaan di wewengkon ieu salila 27 taun. Salila Dogra Raj ngawasaan Kashmir, Srinagar dijadikeun puseur dayeuhna.[9]
Nalika mangsa Kamaharajaan Britania, pamingpin Kashmir ngantepkeun Inggris datang ka Srinagar, tapi teu ngijinkeun Inggris pikeun ngawangun wangunan. Pikeun nyiasatan, Inggris maréntahkeun pikeun nyieun imah kapal anu méwah di luhureun cai anu matak maranéhna bisa nempo kaéndahan situ jeung pagunungan.[10]
Ti saprak kamerdikaan India, imah kapal ieu diwangun sarta dikokolakeun ku urang Hanji Kashmir, anu geus nyicingan ieu situ salila mangabad-abad, ngabudidayakeun taman apung, pasar apung, sarta gaya hirup anu unik di luhureun cai.[10][11]
Pariwisata
[édit | édit sumber]Taman Mughal
[édit | édit sumber]Di sisi-sisi situ, aya babaraha taman anu dijieun nalika jaman Kakaisaran Mughal, sarta aya kénéh nepi ka kiwari, di antarana nyaéta Shalimar jeung Nirshat Bagh. Salian dua taman éta, aya ogé titinggal Kakaisaran Mughal anu séjénna, saperti Masjid Hazratbal, Situ Nigeen, Chashme Shahi, Hari Parbat, Kuil Shankaracharya, jeung komplék pamakaman Mughal anu ngaranna Muzar e Shura.[4]
Shikara
[édit | édit sumber]
Di Situ Dal, urang bisa ngurilingan ieu situ maké parahu leutik anu ngaranna shikara. Shikara mangrupa parahu dayung leutik anu luhurna diterpalan. Shikara geus jadi ikon wisata anu kasohor di Situ Dal. Wisatawan bisa nyaba ka tempat-tempat wisata di sabudeureun situ maké shikara. Salian ti pikeun wisata, shikara ogé dijadikeun imah ku warga lokal.[7]
Pasar apung
[édit | édit sumber]Di Situ Dal ogé aya pasar apung tina shikara. Biasana, pasar apung ieu buka kira-kira jam 5 subuh. Di luhur parahu, biasana patani ngadagangkeu hasil panénna. Kadang ogé aya nu barter barang daganganna. Saliah ti hasil tatanén, di pasar apung ogé sok didagangkeun cinderamata anu unik jeung antik pikeun wisatawan.[7]
Hidrologi
[édit | édit sumber]
Situ Dal miboga lega 18 kilométer pasagi, sarta jerona 6 méter anu pangjerona. 18 kilométer ieu kaasup aréa tanah baseuh anu legana 21,1 kilométer pasagi.[7] Dina tanah baseuh éta, aya taman apung anu dina basa Kashmiri disebut "Rad" tumuwuh ku kembang lotus ti bulan Juli nepi ka Agustus. Situ ieu kabagi ogé jadi opat legok (basin), nyaéta Gagribal, Lokut Dal, Bod Dal jeung Nigeen.[12][13] Babaraha bagian situ ieu beku nalika usum tiris.[4]
Di beulah kaléh situ, aya susukan anu masok kira-kira 80 persén cai ka situ ieu. Sedengkeun di kulon-kiduleun Situ Dal, aya susukan anu ngocorkeun cai kaluar ka anak Walungan Jhelum. Paralel jeung susukan nu tadi, aya kanal anu dilapisan ku batu anu ngahubungkeun situ jeung anak walungan. Kanal ieu digunakeun pikeun kaluar-asupna kapal sarta nyegah taman apung kakeueum nalika caah.[2]
Kadieunakeun, kualitas cai di Situ Dal beuki goréng di dua dékadeu ahir ieu. Daérah sisi anu lega geus diréklamasi sarta geus dijieun jadi taman apung. Hotél-hotél jeung pamodokan diwarangun di sisi situ. Hal ieu nyababkeun limbah dipariceunan ka situ tanpa diolah heula, anu antukna ngotoran lingkungan, jeung nimbulkeun masalah kaséhatan.[2]
Masalah lingkungan utama nyaéta tumuwuhna gulma anu loba teuing, cai anu geus teu hérang deui, sarta aktivitas mikroba anu réa. Proyék Pengembangan Situ Dal dijieun di taun 1978 sarta Pamaréntah Jammu jeung Kashmir ngadopsi kalawan babaraha modifikasi. Dorongan utama di proyék ieu nyaéta pikeun menerkeun lingkungan situ maké pendekatan fisik jeung biologis. Kiwari, proyék ieu keur lumangsung.[2]
Galéri
[édit | édit sumber]-
Shikara di Situ Dal -
Taman taraté -
Situ Dal nalika peuting
Tingali ogé
[édit | édit sumber]Rujukan
[édit | édit sumber]- ↑ World, Beautiful. "Dal Lake Facts & Information - Beautiful World Travel Guide". Facts & Information - Beautiful World Travel Guide (dalam en-US). Diakses tanggal 2020-01-02.
- ↑ a b c d "DAL LAKE". web.archive.org. Diakses tanggal 2020-01-02.
- ↑ Ago, Ravik2492in Photography • 2 Years. "Jab tak hai jaan shoot picture at Dal lake, kashmir - movie". Steemit. Diakses tanggal 2020-01-03.
- ↑ a b c d e "Naik 'Shikara' Sembari Nikmati Keindahan Danau Dal di Kashmir". kumparan (dalam id-ID). Diakses tanggal 2020-01-03.
- ↑ "Kashmir House Boat". kashmirhouseboat.com. Diakses tanggal 2020-01-03. Archived 2020-01-03 di Wayback Machine
- ↑ "9 films that make us crazy about Kashmir". Condé Nast Traveller India (dalam en-IN). Diakses tanggal 2020-01-03.
- ↑ a b c d "Danau Dal, Surga di Bumi India". Pelopor Wisata Halal Dunia (dalam Indonesian). Diakses tanggal 2020-01-02.
- ↑ Schimmel, Annemarie, 1922-2003. (2004). The empire of the great Mughals : history, art and culture. London: Reaktion Books. ISBN 1-86189-185-7. OCLC 61751123.
- ↑ Singh, Gulcharan (1976). Ranjit Singh and his generals. Sujlana Publishers. p. 62.
- ↑ a b "House boats on Dal Lake". web.archive.org. Diakses tanggal 2020-01-03.
- ↑ Singh, Sarina (2005). India, Lonely Planet India. Kashmir (Lonely Planet). p. 342. ISBN 978-1-74059-694-7. Diakses tanggal 28 December 2009.
- ↑ "WebCite query result". www.webcitation.org. Diakses tanggal 2020-01-02.
- ↑ "Restoring the Dal lake to its original glory". Rediff. Diakses tanggal 2020-01-02.