Dwiki Dharmawan

Ti Wikipédia Sunda, énsiklopédi bébas
Dwiki Dharmawan

Dwiki Dharwaman nyaéta salah sahiji musisi Indonésia nu kasohor teu ngan saukur di Indonésia, tapi ogé ka sakuliah dinya.[1] Sutradara pilem, panata tari jeung orkéstra, sarta musisi jazz mancanagara.[1] Lahir di Bandung 19 Agustus 1966.[1] Diajar piano klasik ti umur 7 taun ka Elfa Secioria.[1] Tuluy nincak umurna nu ka-13 taun mimiti diajar music jazz.[1] Dina umurna nu ka-17, nyieun Grup Krakatau bareng jeung Pra B Dharma, Budhy Haryono, jeung Donny Suhendra.[1]
Grup krakatau ieu ngaéksplorasi gamelan sunda nu dikombinasikeun jeung jazz.[1] Nepi ka kiwari ieu grup geus ngurilingan dunya sarta minton dina sawatara konsér jeung féstival internasional saperti Montreux Jazz, North Sea Jazz, Toronto Jazz, Vancouver Jazz, GalapaJazz, Hot Summer Jazz, Midem, Festival Cervantino, Sziget Festival jeung sajabana.[1] Salian ti éta, kungsi minton di sawatara tempat seni pintonan nu kasohor saperti Lincoln Center Summer Outdoor Festival, Chicago Cultural Center, Esplanade, Beijing Concert Hall, sarta Beijing National Center for the Performing Arts jeung sajabana.[1]
Taun 1990 Dwiki mimiti neuleuman rupa-rupa wangun musik tradisional tuluy nyieun album Mystical Mist jeung Magical Match.[2] Taun 2005 jadi co-music director pikeun pagelaran musik spéktakulér Megalithicum Quantum di Jakarta jeung Bali bareng jeung Krakatau.[2] Salian ti éta musik Krakatau ogé geus diaku sacara internasional.[2] Hal ieu dibuktikeun ku ayana Jurnal Worlds of Music nu medal di Amerika Serikat nu nyebutkeun yén Krakatau téh bagéan penting dina khazanah World Music alatan Krakatau geus bisa ngadumaniskeun gamelan sarta musik-musik tradisional lianna jeung musik jazz.[2]
Tepi ka taun 2006 Dwiki geus nyieun album bareng jeung Krakatau nyaéta First Album(1987), Second Album (1988), Kembali Satu (1989), Let There Be Life (1992),Mystical Mist (1994), Magical Match (2000), 2 Worlds (2006) jeung Rhytym Of Reformation (2006).[2] Sedengkeun Dwiki sorangan geus nyieun album solona kalawan judul Nuansa (2002) bareng jeung musisi dunya saperti Mike Stern, Lincoln Goiness, Richie Morales, Neil Stubenhaus, Ricky Lawson jeung Mike Thompson ti Amerika sarta sababaraha musisi Australia saperti Steve Hunter, David Jones jeung Guy Strazullo.[2]

Prestasi[édit | édit sumber]

Préstasi Darmawan di antarana waé kungsi meunang panglélér Penata Musik Terbaik Festival Film Indonesia 1991 dina pilemna Cinta Dalam Sepotong Roti karya Garin Nugroho.[2] Taun 1985 meunang panglélér The Best Keyboard Player dina Yamaha Light Music Contest 1985 di Tokyo, Jepang.[2] Salian seniman, Dwiki ogé jadi Direktur Lembaga Pendidikan Musik Farabi jeung anggota komite musik Dewan Kesenian Jakarta.[1]

Referensi[édit | édit sumber]

  1. a b c d e f g h i j Biografi Dwiki (Diakses tanggal 12 Nopember 2011) (id)
  2. a b c d e f g h Dwiki Dharmawan (Diakses tanggal 12 Nopember 2011) (id)