Istana Cipanas

Ti Wikipédia Sunda, énsiklopédi bébas
Istana Cipanas Kiwari

Istana Cipanas nu mangrupa Istana Kaprésidénan, perenahna di suku Gunung Gedé, Jawa Kulon. Jarakna kira-kira 103 km ti Jakarta ka arah Bandung ngaliwatan Puncak. Ieu istana téh legana leuwih kurang 26 héktar, tapi nepika kiwari ngan saukur 7.760 m² nu dipaké pikeun wangunan. Saleuwihna mah dipinuhan ku pepelakan jeung kebon tutuwuhan hias nu asri, kebon sayur jeung tutuwuhan lianna nu diatur méh sarupa leuweung leutik.

Kecap ‘Cipanas’ asalna tina basa Sunda, ‘cai’ jeung ‘panas’. Ieu wewengkon téh dingaranan Cipanas ku sabab di wewengkon ieu aya sumber cai panas, nu ngandung warirang, jeung kabeneran ayana téħ di jero kompléks istana Cipanas.

Sabenerna mah wangunan induk ieu istana téh awalna milik pribadi saurang tuan tanah Walanda anu diwangun dina taun 1740. Ti mangsa pamaréntahan Gubernur Jendral Gustaf Willem Baron van Imhof, ieu wangunan téh dijadikeun minangka tempat pangreureuhan Gubernur Jéndral Hindia-Walanda.

Istana Cipanas taun 1920-1930

Sababaraha wangunan anu aya di jero kompléks ieu di antarana Paaviliun Yudistira, Paviliun Bima jeung Paviliun Arjuna anu diwangun sababaraha tahap dina taun 1916. Éta ngaran téh dilarapkeun kana wangunan sabada Indonésia merdéka, ku présidén Sukarno. Di bagian tukang rada ka kalér aya Gedong Béntol, anu diwangun dina taun 1945 jeun dua wangunan pangweuteuhna anu diwangun dina taun 1983 nyaéta Paviliun Nakula jeung Paviliun Sadéwa.

Hiji kajadian anu penting nu kungsi kaalaman di ieu isatna sabada kamerdékaan nyaéta lumangsungna sidang kabinét nu diluluguan ku présidén Soekarno dina tanggal 13 Désémber 1965, anu netepkeun robahna nilai duit tina Rp 1.000,- jadi Rp 1,-.

Sedengkeun dina magsa pendudukan Jepang di Indonésia, ieu gedong téh ngan saukur dipaké pikeun panyimpangan gegedén-egedén Jepng dina lalampahanana ti Jakarta ka Bandung atawa sabalikna.

Ieu gedong téh ditetepkeun minangka Istana Kaprésidénan jeung dipaké minangka tempat pangreureuhan Présidén atawa Wakil Présidén katut kulawargana sabada kamerdékaan, saperti halna Camp David di Amérika Serikat.

Unggal rohangn di ieu istana dilengkepan ku parabot anu dijieun tina kai. Di ieu istana téh disimpen rupa-rupa koléksi ukiran Jepara jeung lukisan maéstro seni lukis Indonésia kayaning Basuki Abdullah, Dullah Sujoyono, jeung Lee Man Fong

Tingali Ogé[édit | édit sumber]

Tumbu Luar[édit | édit sumber]