Frequency-division multiplexing

Ti Wikipédia, énsiklopédia bébas basa Sunda
Luncat ka: pituduh, sungsi

Frequency-division multiplexing (FDM) nyaéta wangun multiplexing sinyal dimana sinyal-sinyal informasi (sinyal-sinyal pita dasar) dimodulasi maké sinyal-sinyal pamawa) nu frékuénsina béda-béda sarta tuluy dijumlahkeun pikeun ngahasilkeun hiji sinyal sanyawa (sinyal komposit).

Cara multiplexing nu maké tilu sinyal asupan ieu digambarkeun di handap ieu:

Multiplexing tilu sinyal asupan make cara FDM.

Dina gambar kasebut digambarkeun tilu sinyal asupan jeung sinyal-sinyal pamawa dina wangun spéktrum (doméin frékuénsi)na sarta modulasi DSB digunakeun pikeun ngagambarkeun spéktrumna. Sabenerna rupa modulasi naon waé ogé bisa dipaké dina FDM salila pamisahan sinyal pamawa cukup pikeun nyingkahan tumpang tindih spéktrum. Sanajan kitu, padika modulasi anu paling réa digunakeun dina FDM nyaéta modulasi SSB. Dina ujung panarima (tungtung kanal), katilu sinyal modulasi dipasahkeun ku tilu bandpass filter (BPF) sarta satuluyna didemodulasi (ditimukeun deui sinyal aslina) ngagunakeun tilu osilator lokal.

FDM dipaké dina sistem telepon, telemetri, siaran radio komérsial, televisi, jeung jaringan telekomunikasi. Siaran radio AM komérsial ngagunakeun frékuénsi sinyal pamawa anu dipisah-pisah saanggang 10 kHz dina wilayah frékuénsi antara 540 jeung 1600 kHz. Pamisahan ieu henteu cukup pikeun nyingkahan tumpang tindih pikeun modulasi amplitudo (AM) kalayan fidelitas nu cukup hadé (50 Hz nepi ka 15 kHz). Ku lantaran kitu, setasiun pamancar AM nu frékuénsi pamawana padeukeut sacara géografis dipisahkeun paanggang pikeun ngaminimalkeun interférensi. Siaran radio komérsial modulasi frékuénsi (FM) ngagunakeun frékuénsi—frékuénsi sinyal pamawa ni dipisahkeun saanggang 200 kHz. Dina sistem telepon jarak jauh, 600 atawa leuwih sinyal sora (200 Hz nepi ka 3,2 kHz) dipancarkeun ngaliwatan kabel koéksial atawa tumbu gelombang mikro (microwave) ngagunakeun modulasi SSB kalayan frékuénsi-frékuénsi sinyal pamawa nu dipisahkeun sajauh 4 kHz. Dina prakték, sinyal komposit anu diwangun ku pamisahan sababaraha sinyal dina frékuénsi bisa, dina giliranana, didémodulasi maké frékuénsi sinyal pamawa lianna. Dina hal ieu, frékuénsi pamawa dimaksud mindeng disebut subcarrier.

Tempo ogé[édit | sunting sumber]

Rujukan[édit | sunting sumber]

  1. Hsu, Hwei P., Schaum's Outline of Theory and Problems of Analog and Digital Communications, McGraw Hill, 1993