Lignin

Ti Wikipédia, énsiklopédia bébas
Luncat ka: pituduh, sungsi

Lignin mangrupakeun sanyawa kimia nu ilahar aya dina kai salaku bagian integral dina pinding sél tutuwuhan, utamana trahéid, serat silem, jeung skléréid. Sanyawa ieu téh kaasup sanyawa organik nu panglobana di alam sahandapeun selulosa. Kadar lignin dina kai, gumantung kana jenis jeung umur kaina, aya kira sapertilu nepi ka saparapat beurat garingna.

Guna biologis[édit | sunting sumber]

Lignin téh ngeusi sela-sela pinding sél antara komponén selulosa, hémiselulosa, jeung péktin, nyaéta pikeun nguatkeun pinding sél (sahingga nguatkeun tutuwuhanana).

Ayana lignin téh penting pisan dina nyalurkeun cai dina watang tutuwuhan. Polisakarida dina pinding sél téh hidrofilik pisan, sahingga nyerep cai. Tah, ayana lignin téh ngajadikeun aliran cai jadi leuwih éfisién.

Lignin téh hésé pisan diancurkeun, sahingga pikeun tutuwuhan mah jadi taméng fisik pikeun ngalawan kuman nu narajang jaringan. Pikeun conto, inféksi ku fungi ngarangsang tutuwuhan pikeun ngagundukkeun leuwih loba lignin dina bagian anu kainféksi.

Kapentingan ékonomi[édit | sunting sumber]

Kai nu loba ngandung lignin mah teuas, sahingga jadi bahan baku nu hadé pikeun rupa-rupa larapan. Mun kaina dipaké suluh, lignin bisa ngahasilkeun énérgi leuwih loba batan bagian selulosana. Najan kitu, pikeun pabrik kertas mah lignin téh nyusahkeun, sabab hésé dileungitkeunana. Mun teu dikurangan/dileungitkeun ligninna, kertas nu dihasilkeun bakal kurang beresih/bodas. Prosés ngaleungitkeun lignin tina pulp téh hésé, sahingga nyerep biaya anu gedé dina prosés produksina.

Dina prosés kraft (chemical pulping migunakeun sulfit jeung sulfat), lignin dikaluarkeun tina pulp kai mangrupa sulfat. Sulfat lignin ieu boga sababaraha mangpaat:

Panalungtikan ngeunaan guna lignin sacara komersil munggaran dipigawé ku Marathon Corporation di Rothschild, Wisconsin (USA), taun 1927. Produk munggaranana nu kira bisa nguntungkeun nyaéta agén leather tanning. Usaha kimia lignin Marathon kiwari katelah LignoTech USA, Inc., nu dipimilik ku pausahaan Norwégia, Borregaard.

Struktur jeung biosintésis[édit | sunting sumber]

Lignin téh makromolekul nu massa molekulna leuwih ti 10.000 amu, watekna hidrofobik jeung aromatik. Molekulna diwangun ku rupa-rupa ulangan substruktur anu polana acak.

Sumber rujukan[édit | sunting sumber]

  • Lignin, Wikipédia édisi basa Inggris (3 Agustus 2006)

Tumbu kaluar[édit | sunting sumber]