Kéndan
Karajaan Kéndan ayana di wewengkon Kampung Kéndan, Désa Citaman, Kacamatan Nagrég Kabupatén Bandung ngadeg ti taun 526 M nepi ka 612 M. Raja nu munggaran nyaéta Resiguru Manikmaya ( 526 – 568 M ).[1] Di patempatan ieu kapanggih patung Durga leutik nu ayeuna aya di Museum Pusat Jakarta. Ogé dina taun 2000 an kapendak aya ruruntuk candi ( candi bojongmenje ) tina batu di sagigireun walungan Cikijing, caket jalan raya Bandung - Garut di wewengkon Rancaékék. Nami Kendan numutkeun élmu kabuhunan téh hartosna puseur sabangsaning alat, ogé mangrupa jenis batu nu loba kapanggih di wewengkon éta.
Pamaréntahan Kendan
[édit | édit sumber]Karajaan ieu ngadeg ti taun 526 M nepi ka 612 M.[2] Raja nu munggaran nyaéta Resiguru Manikmaya ( 526 – 568 M ) maréntah salami 42 taun, kagungan istri ka Tirtakancana, puterina Maharaja Suryawarman Raja Tarumanagara VII. Nya wewengkon ieu téh minangka hadiah pemere ti mertuana. Resiguru Manikmaya ieu téh nyaéta pendeta siwa. Saterasna kalungguhanna digentos ku putrana Sura Liman Sakti atawa Rajaputra nu ti leutik nepi ka bujang ngiring nganjrek di akina di puseur dayeuh Tarumanagara. Di istrénan jadi raja di Kendan kala 12 Kresnapaksa bulan Asuji taun 490 Saka (kira-kira tanggal 5 Oktober 568 M). Migarwa ka Mulyasari turunan Kudungga ti Bakulapura, kagungan putra 2 urang nyaéta Kandiawan jeung Kandiawati. Kandiawati tuluy kawin jeung sodagar ti Sumatera nu saterusna bumen-bumen di ditu ngiring ka salakina. Salajéngna kakawasaan dilinggihkeun ti Sura Liman Sakti ka Kandiawan putrana nu maréntah salila 15 taun ( 597 – 612 M ), ngan teu salamina di Kendan, anjeunna pindah padumukan ka Medang Jati atawa Medang Gana ku lantaran sateuacan diistrenan jadi raja di Kendan anjeunna tos jadi resi guru di dinya. Saparantosna mangsa 15 taun anjeunna léngsér kaprabon margi jadi patapa di Layuwatang, jadi katelah Rajaresi Déwaraja atawa Sang Layuwatang.
Daftar Raja Kendan
[édit | édit sumber]- Resiguru Manikmaya ( 526 – 568 M )
- Sura Liman Sakti (12 Kresnapaksa bulan Asuji 490 Saka/5 Oktober 568 M - 597 M)
- Kandiawan ( 597 – 612 M )
- Wretikandayun (612) saterusna ngadegkeun Karajaan Galuh kalawan abiseka Maharaja Suradarma Wretikandayun
Suksési
[édit | édit sumber]Kandiawan kagungan putera 5 urang nyaéta: Mangukuhan, Karungkalah, Katungmaralah, Sandanggréba, jeung Wretikandayun. Lima puterana katelah Pancaputra ieu masing-masing dipasihan kalungguhan mangrupi Rahyangta Kulikuli, Rahyangta Surawalen, Rahyangta Pales Awi, Rahyangta Rawung Langit jeung nu bungsu Wretikandayun dijadikeun Rajaresi di Mandala Menir. Lajéng kalungguhan raja ti saprak jadi patapa di pasrahkeun ka Wretikandayun.
Rujukan
[édit | édit sumber]- ↑ http://www.kompasiana.com/langitmegabirusekali/kerajaan-pajajaran-bermula-di-nagreg_5509d29da33311226a2e3b91
- ↑ Carita Parahiyangan, Nusantara Parwa IV sarga 1 jeung Jawadwipa Parwa I sarga 2
 |
Artikel ngeunaan Sunda ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan. |