Peuyeum

Ti Wikipédia Sunda, énsiklopédi bébas
Peuyeum
Peuyeum

Peuyeum mangrupa kadaharan tradisional Indonesia, rasana amis lantaran mangrupa hasil fermentasi.[1] Peuyeum dijieun tina bahan baku nu tangtu anu di fermentasi alatan bantuan mikroorganisme Saccharomyces cerivisiae anu ngarobah karbohidrat (fruktosa sarta glukosa) jadi alkohol sarta karbondioksida.[1] Iwal ti Saccharomyces cerivisiae aya mikroorganisme séjén saperti Mucorchlamidosporus sarta Endomycopsisfibuligera anu mantuan ngarobah pati jadi gula (glukosa).[1] Bahan peuyeum rupa-rupa gumantung kana kabutuhan, bisa maké béas ketan atawa sampeu.[1] Peuyeum nu jieun tina béas ketan disebutna peuyeum ketan sedengkeun anu dijieun tina sampeu disebutna peuyeum sampeu.[1]

Peuyeum Ketan[édit | édit sumber]

Peuyeum Ketan Hideung

Peuyeum ketan nyaéta peuyeum anu dijieun tina ketan hideung atawa ketan bodas meunang nyeupan, maké dicampur ragi, dibunian 2-3 poé.[1]

Cara nyieun[édit | édit sumber]

Béas ketan dikeueum salila 4 jam, tuluy daun kiamis diasupkeun bari nambahan cai, terus disaring.[2] Saterusna béas ketan anu geus dikeueum, diseupan nepi ka satengah asak, tuluy diangkat, tuluy dina béas ketan anu geus satengah asak ditambahkeun cai ki amis pikeun ngawarnaan jadi héjo tuluy campuran éta digalokeun sangkan warnana rata.[2] Campuran éta diseupan nepi ka asak kira-kira salila 30 menit,sanggeus asak campuran dijait, tuluy ditiiskeun di luhur nyiru, saterusna dibéré ragi anu geus lembut leuwih tiheula, digalokeun nepi ka rata.[2] Pamungkas campuran dibungkus maké plastik atawa daun cau singrapet (biasana dina bungkusan ditambahkeun bawang beureum sarta cabé pikeun peuyeumna bisa jadi atawa henteu garah), tuluy ditunda salila 2-3 poé (difermentasi).[2]

Peuyeum Sampeu[édit | édit sumber]

peuyeum ketan

Peuyeum sampeu teu béda jauh jeung peuyeum ketan ngan béda bahan bakuna wungkul nyaéta sampeu.

  • Cara pikeun nyieun peuyeum sampeu :

Seupan sampeu nepi ka asak (Ulah asak teuing alatan engké hasilna jadi benyek), tuluy sanggeus tiis tendeun sampeu dina wadah bari ditutup anu geus diamparan daun cau sabada éta purulukan peuyeum ku ragi nepi ka rata.[3] Tutupan deui ku daun cau tuluy tutup maké tutup wadahnya.[3] Simpen di tempat haneut salila 2-3 poé.[3]

Rujukan[édit | édit sumber]

  1. a b c d e f (id)Rachmat Taufiq Hidayat, spk. Peperenian Urang Sunda. PT Kiblat Buku Utama. Bandung 2005.
  2. a b c d (id)cara membuat tape ketan.
  3. a b c (id)cara membuat tape singkong