Sésérok

Ti Wikipédia Sunda, énsiklopédi bébas
Loncat ke navigasi Loncat ke pencarian

Sésérok nyaéta salah sahiji parabot dapur tradisional Sunda.[1] Fungsina nyaéta pikeun miiskeun kadaharan nu kakara réngsé digoréng sangkan minyakna nyarudcudan, henteu nyerep kana kadaharanana, utamana mah kadaharan nu digoréng téh sangkan jadi garing.[1] Sakapeung mah sok dipaké ogé pikeun kadaharan anu dikulub.[1] Geus ilahar ieu sésérok téh diteundeunna deukeut jeung katél.[1]

Jenis bahan[édit | édit sumber]

Baheula mah sésérok téh dijieunna tina awi, ngan ku kumembangna jaman, ayeuna mah ieu sésérok umumna dijieun tina séng, aluminium, sténlis, atawa kawat.[1] Sok sanajan bahan pikeun nyieun ieu parabot téh geus robah, tapi fungsina mah angger sarua.[1] Wangun jeung ukuran sésérok rupa-rupa. Sésérok nu dijieun tina anyaman awi, biasana mah wangunna juru tilu kawas kolécér.[1] Arah bagéan panyekelanna atawa puhuna biasana mah nyongcot, sedengkeun bagéan tungtungna ngarubak.[1] Panjangna kurang leuwih 40–50 cm.[1] Sésérok anyaman awi mah bisa dijieun ku sorangan. Kiwari geus langka pisan manggihanana boh di pasar boh di warung.[1] Kakuranganna ieu sésérok téh sok téréh ruksak, komo mun teu dihadé-hadé mah.

Sedengkeun sésérok nu dijieun tina bahan logam, kayaning séng, aluminium, sténlis, jeung kawat umumna mah wangunna buleud sarta laliangan laleutik. Iwal nu dijieun tina beulitan kawat nu ngabunder kawas wangun ramat lancah, tangtuna liangla leuwih badag.[1] Di bagéan puhu atawa panyekelanna leutik wangunna kawas iteuk. Bagéan panyekelna mah biasana dijieun tina kai hsangkan teu gancang panas. Ngan loba ogé nu panyekelna dijieun tina logam. Ukuran sésérok logam mah variéatif, leutik, sedeng jeung badag, kalawan diaméter ti 25 cm nepi ka 60 cm.[1]

Pamakéan[édit | édit sumber]

Ibu-ibu mah biasana maké sésérok nu ukuran leutik, gumantung loba henteuna anggahota kulawarga.[1] Sésérok badag mah sok dipakéna ku tukang dagang goréngan atawa ku candoli di pilemburan. Sésérok nu dipaké ku candoli varéatif, kumaha bahan nu digoréngna, kayaning bawang beureum, bawang bodas, hayam, lauk, atawa kurupuk.[1] Mun ieu parabot dapur téh ruksak, biasana mah sok dioméan deui, mun dijieunna tina awi mah sok langsung dipiceun atawa dijieun suluh.[1] Ngarawat sésérok mah gampang, da ngan ukur diteundeun diluhureun katél wungkul. Sakapeung mah sok diteundeun di luhureun rak dapur atawa digantungkeun.[1]

Rujukan[édit | édit sumber]

  1. a b c d e f g h i j k l m n o p "Erok-Erok, Alat Dapur Peniris Gorengan". arsip.tembi.net. Diakses tanggal 2017-10-10.