Wijén
| Wijén | |
|---|---|
| |
| Tanaman wijen | |
| Klasifikasi ilmiah | |
| Karajaan: | Plantae |
| (unranked): | Angiosperms |
| (unranked): | Eudicots |
| (unranked): | Asterids |
| Order: | Lamiales |
| Kulawarga: | Pedaliaceae |
| Génus: | Sesamum |
| Spésiés: | S. indicum |
| Ngaran binomial | |
| Sesamum indicum L. | |
Wijén (Sesamum indicum L.) nyaéta ngaran salah sahiji sambara anu kaasup dina kulawarga Pedaliaceae.[1] Wijén dibudidayakeun minangka sumber minyak nabati, anu dipikawanoh minangka minyak wijén, anu asalna tina ekstraksi sikina.[1] Wijén asalna ti wewengkon Afrika tropis tuluy sumebar ka wétan nepi ka India sarta Tiongkok.[1] Akar wijén mangrupa akar tunggang.[1] Rupa morfologina gampang dipangaruhan ku lingkungan sabudeureunana.[1] Biasana jangkungna ti 60 nepi ka 120 cm, bisa ogé nepi ka 2 - 3 méter.[1] Watangna nu kolot kaian, wangunna pasagi, aya keliran, rambutan, sarta ngarancabang monopodial, warnana héjo.[1] Daunna nunggal, wangunna siga létah manjang , aya rambutan, tungtung daunna seukeut, sisina rérégéan, panjangna 5 nepi ka 20 cm, rubakna 1,5 nepi ka 4 cm, warnana héjo.[1] Kembangna tumuwuh dina kélék daun, biasana tilu tapi ngan hiji anu biasana ngembang alus.[1]
Sakumna bagian tangkal wijén bisa dimangpaatkeun, boh watang, daun atawa sikina.[2] Watang, daun sarta bagian séjénna bisa dimangpaatkeun pikeun biomassa.[2] Daun bisa ogé dimangpaatkeun pikeun dijadikeun lalab sarta ubar.[2] Sedengkeun siki wijén dimangpaatkeun langsung dina wangun siki sarta bisa ogé dikokolakeun jadi minyak wijén jeung hampas (bungkil) wijén.[2] Siki wijén bisa dipaké minangka panambah rasa rupa-rupa kuéh kawas ondé-ondé, enténg-enténg wijén, kuéh baseuh jeung sajabana, sarta bisa ogé dipaké minangka ubar.[2] Wijén meunang landian “The Queen of Oil Seeds Crops” sabab siki wijén miboga kandungan giji anu luhung anu alus pikeun konsuménna.[2] Minyak wijén bisa dipaké minangka bahan kadaharan, ubar, kosmétik, penerangan, inséktisida jeung sajabana.[2] Minyak wijén pohara alus pikeun dikonsumsi sapopoé alatan mangrupa salah sahiji minyak nabati anu loba ngandung asam lemak teu jenuh anu luhung anu ngahontal 84 %.[2] Sedengkeun bungkil bisa dipaké minangka campuran parab ingon-ingon.[2]
